DILI, 26 dezembru 2024 (TATOLI)—Ministériu Transporte no Komunikasaun (MTK) liuhusi Diresaun Nasionál Transporte Terrestre (DNTT) hahú estabelese ona parajen públiku balun iha kapitál Dili.
“Kona-ba parajen públiku nian, ida-ne’e DNTT nia planu ba tinan ne’e, daudaun ne’e prosesu la’o hela no ita estabelese balun ona iha kapitál Dili hanesan iha Vila-Verde no Kampung Baru, restu prosesu kontinua la’o hela,” Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, informa,ba Agência Tatoli, iha ninia knaa fatin, DNTT, Balide, kinta ne’e.
DNTT hakarak estabelese parajen públiku 10 maibé iha aprovizionamentu deside hatun ba neen tanba parajen ne’ebé agora propoin ne’e boot kompara ho antes sira.
“Loloos ne’e atu estabelese hotu iha tinan ne’e maibé ita hasoru difikuldadu oituan iha terrenu mak fatin balun atu estabelese maibé Ministériu Obra Públika (MOP) mós planu tinan oin atu halo alargamentu ba estrada públiku balun, entaun DNTT seidauk bele estabelese hotu iha tinan ne’e, hein MOP halo alargamentu ba estrada hotu mak ita foin estabelese,” nia akresenta.
Notísia relevante : MTK tinan ne’e sei reabilita parajen transporte públiku 16 iha Dili
Fatin sira ne’ebé daudaun DNTT sei suspende ne’e iha parte Becora nian, maibé fatin sira seluk ne’e serbisu kontinua la’o, parajen ne’e rasik DNTT estabelese ba iha dalan públiku sira ne’ebé hetan movimentu barak.
Objetivu tau prioridade hadi’a parajen transporte públiku tanba hakarak eduka komunidade hodi hein transporte hanesan taxi no bemo iha parajen, enkuantu kondutór sira mós hanesan atu tula pasajeiru tenke tula iha parajen.
“Ba bus sira para hotu iha terminál de’it mak tula pasajeiru, ida-ne’e sira la tama mai iha Dili laran, ba oin mós ita sei hasai regulamentu atu bus sira halai ba munisípiu tenke loron de’it ona, labele la’o kalan hodi evita asidente,” nia tenik.
DNTT prevee orsamentu hamutuk $140.000 atu hadi’a parajen.
Jornalista : Arminda Fonseca
Editora : Julia Chatarina
