BAUKAU, 04 Maiu 2026 (TATOLI)—Projetu reabilitasaun estrada rurál hamutuk pakote ualu iha Munisípiu Baukau sei hein orden serbisu husi Ministériu Obra Públika (MOP).
Koordenadór Tékniku Obra Públika Destakadu Munisípiu Baukau, Diego Cipriano Caleza, esplika projetu estrada rurál hamutuk pakote ualu referidu nu’udár faze dahuluk ba tinan-ne’e ne’ebé selebra ona kontratu ho Ministériu Obra Públika iha iha semana kotuk (30/04/2026).
“Kompañia sira sei submete kontratu hodi hetan orden traballu antes hahú projetu iha-ne’ebé durasaun kontratu durante loron-365,” Diego Caleza infroma ba TATOLI iha ninia kna’ar fatin, Vila Nova, Segunda ne’e.
Caleza relata estrada hirak-ne’e lokaliza iha Postu Administrativu Kelikai iha Suku Lakuliu diresaun bá Lakudala to’o Uaibuitai hamutuk pakote tolu ho distánsia kilómetru 7.25, reabilitasaun estrada husi Lawaliu, Suku Baguia to’o suku Makalaku hamutuk pakote rua ho distánsia kilómetru lima (5), Postu Administrativu Matebian iha Suku Laisorulai bá Maluru hamutuk pakote ida ho distánsia kilómetru 2.65.
Seluk, Postu Administrativu Laga husi Suku Atelari ba Borodua hamutuk pakote ida distánsia kilómetru 2.85 no reabilitasaun estrada rurál diresaun Suku Seisál bá Festau, Suku Samalari, Postu Administrativu Baukau Vila hamutuk pakote ida ho distánsia kilómetru tolu (3).
“Tinan-ne’e iha pakote sanulu-resin-rua. Pakote ualu mak uluk ona, enkuantu haat seluk sei anúnsia iha tempu besik” Caleza akresenta.
Projetu reabilitasaun estrada iha Suku Lakuliu to’o Uaibuitai iha Suku Letemumu ne’e kategoria pakote II, responsabiliza husi Kompañia Merijossa DGM, Unip, Lda ho totál orsamentu $449.738,06, pakote II responsabiliza husi kompañia Bengram-Rozi Construction Unipessoal, Lda ho valór orsamentu hamutuk $488.982,90 no pakote III responsabiliza husi kompañia Jamira Unip, Lda ho orsamentu hamutuk $436.009,74.
Projetu reabilitasaun estrada pakote I husi Lawaliu, Suku Baguia to’o Suku Makalaku hamutuk rua responsabiliza husi kompañia JSN Imanuel 25 Unipessoal, Lda ho valór orsamentu hamutuk $430.655,20 no pakote seluk responsabiliza husi Kompañia Jatono Unip, Lda ho totál orsamentu hamutuk $430.169,30.
Kompañia Otryan-13, Unip, Lda responsabiliza obra iha Postu Administrativu Matebian husi Suku Laisorulai bá Maluru hamutuk pakote I ho distánsia kilómetru 2.65, ho orsamentu hamutuk $387.786,82.
Aleinde ne’e, pakote I iha Postu administrativu Laga husi Suku Atelari bá Borodua responsabiliza husi kompañia Adedebedeall, Unip, Lda ho orsamentu hamutuk $456.644,34 no reabilitasaun estrada rurál Diresaun Suku Seisál, Postu Administrativu Baukau Vila bá Festau, Suku Makalaku, Postu Administrativu Kelikai hamutuk pakote I, responsabilizal husi kompañia NenoN5, Unip, Lda- JV Waiaca ho orsamentu hamutuk $ 577.261,72.
Entretantu, total estrada rurál iha Munisípiu Baukau hamutuk distánsia kilómetru 500-resin iha-ne’ebé reabilita ona kilómetru 276, enkuantu kilómetru 200-resin seidauk reabilitadu.
Jornalista: Natalino Belo
Editór: Xisto Freitas da Piedade
