DILI, 04 Maiu (TATOLI)–CEO Timor-Leste Heart Fund (TLHF), Jane Williams, segunda ne’e, ho ekipa no akompañadu husi Pfizer Global Health Fellowship, hasoru malu ho Prezidente Repúblika José Ramos-Horta hodi aprezenta planeamentu estratéjiku moras kardiovaskulár ne’ebé daudaun ne’e timoroan sira enfrenta.
Jane Williams esplika, dezenvolvimentu sistema dadus kardiaku ne’ebé sentralizadu iha Timor-Leste no inisiativa ne’e iha objetivu atu hametin kualidade kura no planeamentu estratéjiku ba moras kardiovaskulár iha rai-laran.
”Reuniaun ohin, ami ko’alia oinsa mak halo kolaborasaun di’ak liután ho ami-nia parséiru ida-ne’ebé mak semana ida-ne’e mai vizita Timor-Leste, sira husi Pfizer Global Health Fellowship, ne’ebé sira koko atu ajuda ekipa kardiolójia sira iha Hospitál Nasionál Guido Valadares, atu estabelese sistema ida-ne’ebé sentralizada, nune’e ami bele kolekta data ba moras kardiovaskular, moras rematizmu fuan,” Jane hateten ba jornalista sira hafoin ramata enkontru ho Prezidenet repúblika, José Ramos-Horta, iha Palásiu Prezidensiál Nicolau Lobato, Bairru Pite.
Nia dehan, objetivu prinsipál mak atu komprende di’ak liután tipu moras fuan ne’ebé komunidade enfrenta, hodi halo planeamentu estratéjiku oinsá maneja moras sira ne’e no halo planu prevensaun ne’ebé di’ak.
Iha sorumutu ne’e, Prezidente Repúblika fó apoiu tomak ba projetu ne’e no reitera importánsia husi saúde fuan no oinsá komunidade bele asesu ba kura ne’ebé kualidade, inklui edukasaun ba povu atu kuida sira-nia saúde rasik.
Nia dehan, ekipa parseiru internasionál ne’ebé mai husi Korea Súl no Estadu Unidu Amérika iha Timor-Leste hodi haree kondisaun reál.
Sira halo ona observasaun ba sistema rejistu pasiente iha HNGV no sei kontinua vizita ba Ospitál Rejionál Baukau hodi avalia Sistema-ne’ebé mak di’ak-liu atu aplika.
Jornalista : Hortencio Sanchez
Editór : Cancio Ximenes
