BAUKAU, 05 Maiu 2026 (TATOLI)—Autoridade lokál konsidera instalasaun liña internet Starlink fasilita ona serbisu administrasaun suku liuliu hala’o konetividade ho liña instalasaun sira.
Xefe Suku Uatuhako, Postu Administrativu Venilale, Crisóstomo Correia konsidera liña internet ne’ebé instala iha sede suku hakmaan ona prosesu serbisu administrasaun ligadu ho prenxementu livru oitu (8) husi Ministériu Administrasaun Estatál (MAE) no prenxe dadus kona-ba suku liuliu monografia no demografia.
“Monta ona no fasilita ona ami maibé tékniku liu ne’e presiza sei iha atensaun,” Xefe Suku Uatuhako hateten iha Salaun Apuramentu Administrasaun Munisipál Vila Nova, Baukau, Tersa ne’e.
Crisóstomo rekomenda Governu presiza aloka orsamentu ba pulsa no manutensaun inklui hala’o formasaun ba utilizasaun sistema liña internet iha kada suku tanba sebisu públiku hotu atualmente liuhusi teknolojia.
“Foin mak Timor adapta iha suku, presiza espesialista ba teknolojia ne’e,” Correia akresenta.
Iha fatin hanesan, Sekretáriu Munisipál Asuntu Administrasaun no Finansa Baukau, Juvinal Daniel Filipe hateten Starlink faze dahuluk instala ona iha suku hotu no tuir planu faze daruak sei kontinua instala iha edifisiu administrasaun munisipál, serbisu munisipál, postu administrativu inklui delegasaun territoriál iha Munisipiu Baukau.
“Ita simu informasaun husi nasionál sei kontinua instala iha edifísiu hotu,” Juvinal hateten.
Juvinal salienta Starlink ne’ebé oras ne’e instala ona iha suku sira iha faze promosaun maibé hahú tinan-oin autoridade munisipál planeia atu prevee orsamentu iha Planu Asaun Anúal (PAA) hodi enxe pakote iha-ne’ebé sei bazeia ba totál Starlink ne’ebé instala iha Munisípiu Baukau.
Entretantu, totál Starlink ne’ebé monta iha faze dahuluk iha Baukau hamutuk 62 iha suku 62 ho kapasidade 222 Mbps, enkuantu faze daruak sei kontinua iha postu administrativu ualu, edifisiu autoridade munisipál, serbisu munisipál 18 no delegasaun territoriál ualu.
Jornalista: Natalino Belo
Editór: Xisto Freitas da Piedade
