BAUKAU, 06 Maiu 2026 (TATOLI)—Autoridade Protesaun Sivíl (APC-sigla portugeza) Munisípiu Baukau rejista uma komunidade hamutuk 29 ne’ebé hetan estragu kauza husi akontesimentu dezastre naturál durante fulan-Abríl tinan ne’e.
Komandante Operasaun APC Baukau, Francisco Viana Freitas, esplika uma 29 referidu estragu bainhira akontense inundasaun, inséndiu, anin-boot no rai-halai iha-ne’ebé akontese iha postu administrativu ualu iha Munisípiu Baukau.
“Vítima sira-ne’e hetan ona apioa emerjénsia no sei iha faze verikasaun ba kategoria no sei reverifika husi nasionál antes apoia materiál rekuperasaun,” Francisco Viana Freitas informa ba TATOLI iha ninia kna’ar fatin, Vila Antiga, Baukau, Kuarta ne’e.
Viana relata dezastre naturál iha Postu Administrativu Baukau Vila rezulta uma rua hetan estragu kauza husi anin-boot ne’ebé rezulta mós família rua husi totál membru 11 sai vítima, postu administrativu Baguia akontese uma lima hetan estragu husi anin iha tolu, inséndiu ida no rai-halai ida iha-ne’ebé rezulta membru família hamutuk 33 sai vítima.
Seluk, Postu Administrativu Laga iha uma-kain neen kompostu husi vítima ba anin iha lima no inundasaun ida no totál membru família 23 sai vítima. Postu Kelikai Antigu hamutuk rua kauza husi anin hodi rezulta membru família hamutuk hitu mak sai vítima.
Postu administrativu Kelikai hamutuk tolu kompostu anin-boot ida no rai-halai rua no membru família sia mak vítima, postu Matebian hamutuk kazu lima hodi rezulta membru família na’in-sia vítima kauza husi akontese anin-boot tolu, inséndiu ida no rai-halai ida.
Postu Administrativu Venilale akontese dezastre naturál hamutuk tolu kauza husi anin-boot hodi rezulta membru família na’in-16 sai vítima no Postu Administrativu Vemasse rezulta uma tolu hetan estragu kauza husi anin-boot iha rua no inséndiu ida iha-ne’ebé membru família hamutuk 15 sai vítima.
“Husu komunidade kontinua asegura an husi fatin risku liuliu mota no tasi ninin inklui rai-lolon,” Viana apela.
APC Baukau rasik distribui ona apoia emerjénsia ba vítima sira hanesan hahán no ekipamentu dapur hamutuk item 13 kompostu husi foos, mina, ikan-lata, dosi, basia, balde no seluk tan.
Entretantu, totál kazu hamutuk 29 kompostu husi kauza husi anin-boot hamutuk 21, inséndiu tolu, inundasaun ida no rai-halai haat, enkuantu vítima ba akontesimentu hirak-ne’e hamutuk membru família 136 kompostu mane 68 no feto 68.
Jornalista: Natalino Belo
Editór: Xisto Freitas da Piedade
