VIKEKE, 06 Maiu 2026 (TATOLI)—Autoridade, veteranu no komunidade Suku Makadike de Baixo, Postu Administrativu Uatulari, Munisípiu Vikeke realiza feira produtu lokál hodi komemora Loron Restaurasaun Independénsia RDTL ba da-XXIV, 20 Maiu 2002-20 Maiu 2026.
Iha abertura feira produtu lokál ne’e, Administradór Postu Uatulari, Jorge Ribeiro, haktuir realizasaun feira ne’e inisiativa mai husi autoridade no komunidade husi Suku Makadike de Baixo rasik.
Autoridade Postu Uatulari ne’e husu komunidade tenke fa’an produtu lokál sira iha stand sira-ne’ebé estabelese ona atu vizitór sira bá vizita karik bele sosa produtu lokál hodi konsume.
“Ha’u husu ba inan-aman sira fa’an produtu lokál sira hanesan na’an manu Timor, na’an meda, hakmerik, desak no produtu sira seluk tan. Hahú husi ohin bá-oin ita mós loke jogu sira iha feira referida,” nia solisita.
Nia apela ba joven sira tenke mantein pás no estabalidade iha feira atu ema hotu-hotu bele hakat mai sosa produtu sira-ne’ebé komunidade sira fa’an iha feira.
Iha fatin hanesan, Komandante Polísia Eskuadra Uatulari, Inspetór Xefe Polísia, Salvador de Jesus, hateten PNTL kontinua akompaña konsellu suku sira hodi asegura atividade feira ba komemorasaun Loron Restaurasaun Independénsia iha Postu Uatulari.
Iha biban ne’e, Xefe Suku Makadike de Baixo, Rogério da Silva, tenik nia sei hamutuk ho komunidade asegura atividade feira ne’e to’o 20 Maiu.
Iha serimónia abertura feira ne’ebé hala’o iha Kuarta ne’e (06/05/2026) ne’e partisipa husi autoridade lokál Postu Uatulari, autoridade seguransa, veteranu, juventude, negosiante no komunidade iha Postu Administrativu Uatulari.
Jornalista: Vitorino Lopes da Costa
Editór : Xisto Freita da Piedade
