OEKUSI, 06 Maiu 2026 (TATOLI) – Diretór Diresaun Rejionál Infraestrutura (DRI) iha Rejiaun Administrativa Espesiál Oekusi Ambeno (RAEOA), Remígio Nuno Sila, konfirma kona-ba konstrusaun ponte alternativa, ne’ebé lokaliza iha bairru Paut aldeia Oébaha suku Bobometo sub-rejiaun Oésilo atinje ona 85%, hela de’it 15% empreza finaliza ona.
“Ponte Paut, oras ne’e serbisu paradu hela, tanba kategória projetu emerjénsia entaun suspende mós hein desizaun KAFED, loloos kompañia fui ona betaun ba estrada sorin ne’ebé la asesu, nia progresu fíziku hela de’it 15% remata ona, tanba tuir relatóriu no fiskalizasaun, nia serbisu fizíku to’o ona 85%,” nia hateten iha Oekusi.
Notísia relevante:Projetu emerjénsia 22 iha Oekusi suspendidu, hein desizaun Konsellu KAFED
Nia espera katak, iha tempu-badak bainhira iha ona dezizaun finál husi Konsellu Administrasaun Fundu Espesiál Dezenvolvimentu (KAFED), bele hahú hikas serbisu, tanba sei iha Sekretáriu FED, hanesan responsabilidade másima ba kabimentasaun ba projetu sira iha Oekusi, kuandu iha ona desizaun ruma, maka Diresaun Rejionál Infraestrutura (DRI) sei halo públikasaun hodi hahú fali serbisu.
Nia esplika, kona-ba projetu ponte Oébaha iha item barak, hanesan eskavasaun gabiaun, instalasaun rede ba fatuk nia serbisu konklui ona, item seluk maka ponte ho nia drenajen inklui monta arampu ho nia médida metru-haat ne’ebé ordér direita husi nasaun viziña.
“Serbisu ida-ne’e mós hotu ona, nia item serbisu hela de’it materiál konkrit betaun iha ponte leten, ne’e maka hela 15% atu hotu ona, maibé antes atu fui betaun, ekipa integradu sei tuun ba terenu hodi apoia tékniku atu kumpre padraun tékniku ba espesifikasaun materiál sira no estrutura besi, tanba antes ne’e ami rekomenda atu hadia estrutura besi betaun nian,” nia hateten.
Juliano Quefi, nu’udar tékniku husi kompañia Bobometo Unip, Lda, promete sei finaliza bainhira iha ona orientasaun husi Governu tanba materiál no traballadór preparadu.
“Ita observa kuaze serbisu fíziku besik atu remata ona, falta serbisu ki’ik balun presiza kompleta, tanba materiál sira ita ordér kompletu ona iha lokasi, ita-nia traballdór sira kontinua hein, ne’ebé ita hein finaliza de’it,” nia hateten.
Entretantu, ponte Oébaha lokaliza iha bairru Paut aldeia Oébaha suku Bobometo sub-rejiaun Oésilo, nu’udar dalan alternativa atu liga bá sub-rejiaun Oésilo, Pássabe inklui Nítibe sorin.
Oébaha ezekuta husi konstrusaun ponte kompañia lokál Bobometo Unip, Lda ho valór kontratu $841,871.06, Autoridade RAEOA aloka husi Orsamentu Jerál Estadu (OJE) 2025.
Jornalista: Abílio Elo Nini
Editór: Rafael Ximenes de A. Belo
