DILI, 06 Maiu 2026 (TATOLI)–Korpu Eskuteru Katólika Timor-Leste (KEKTL) liuhusi Pe. Mariano Quintão do Rego, hasoru malu ho Prezidente Repúblika José Ramos-Horta hodi konvida Xefe Estadu partisipa iha Jambore Nasionál ne’ebé sei realiza iha Reziaun Administrativa Oekusi Ambenu (RAEOA) iha tinan ida-ne’e.
“Ami mai hasoru ita-nia Prezidente atu konvida ba partisipa Jambore iha Oekusi, Prezidente fó resposta pozitivu ba ami-nia konvite ne’ebé sei bolu nia atu ba marka prezensa iha Kongresu Nasionál, aumezmu tempu ami sei halo atividade Jambore Nasionál ida iha Oekusi, hodi selebra tinan 50 liuba no ami atu entrega lensu onra,” Pe. Mariano hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, ohin.
Nia dehan, durante enkontru, Xefe Estadu apoiu másimu ba programa hirak ne’e no sei marka prezensa iha atividade sira hotu.
Nune’e, Xefe Estadu husu KEKTL atu kontinua halo buat di’ak no fó formasaun ba joven no labarik sira iha Timor-Leste.
“Mensajen husi Xefe Estadu dehan kontinua halo buat di’ak, uma kreda nafatin kontinua apoia ami-nia formasaun juventude ho labarik sira liuliu ezisténsia korpu Eskuteiru,” nia dehan.
Pe. Mariano mós informa, durante ne’e públiku hatene de’it katak KEKTL sai de’it seguransa iha eventu relijiozu ka Igreja Katóliku nian, maibé KEKTL mós hala’o programa seluk hanesan afiliasaun kona-ba formasaun karáter umanu no inklui formasaun ema ho natureza tuir fiar katóliku nian.
KEKTL eziste iha Timor-Leste hahú iha tinan 1971 husi amu-lulik Timoroan no misionáriu sira, no rezultadu husi ezisténsia KEKTL to’o ohin loron kontribui ona ba rekursu umanu hodi prodús líder foinsa’e sira ne’ebé uluk no balun atuálmente asume kargu hanesan Primeiru-Ministru, membru Parlamentu, membru Governu no iha pozisaun estratéjika sira iha sosiedade.
Jornalista : Hortêncio Sanchez
Editór : Cancio Ximenes
