Timor-Leste kondena atake resente Iraun hasoru EAU
DILI, 06 Maiu 2026 (TATOLI) – Timor-Leste kondena ho termu ne’ebé forte liu ba aktu agresaun Iraun nian iha loron 04 fulan-Maiu tinan 2026 hasoru Emiradus Árabes Unidus (EAU), ne’ebé konstitui dezafiu no asaltu ida ne’ebé maka’as hasoru lei internasionál no Karta Organizasaun Nasaun Unida (ONU) nian.
Forsa defeza Emiradu Árabe Unidu nian ho susesu interseta misil balístiku 12, misil kruzeiru tolu (3) no UAV 4. Ida-ne’e mak atake ida seluk ne’ebé naun provokadu husi Iraun hasoru nasaun Árabe ida-ne’ebé la envolve iha funu ne’ebé kontinua entre Israel, Estadu Unidu no Iraun.
Asembleia Jerál ONU no Konsellu Seguransa tenke fó sai avizu formál ida ba Iraun atu para atake sira seluk hasoru nasaun sira GCC nian.
Timor-Leste hamriik hamutuk ho Governu no povu EÁU kontra Iraun nia violasaun repetida ba soberania, independénsia no integridade territoriál EÁU nian.
“Hanesan nasaun ida-ne’ebé harii iha cinzas husi okupasaun no triunfu diálogu nian, Timor-Leste hatene kustu loloos agresaun nian. Atake sira ba Emiradu Árabe Unidu la’ós de’it asaltu ba nasaun belun ida maibé mós ameasa direta ida ba pás rejionál no orden internasionál ne’ebé bazeia ba regra sira-ne’ebé proteje Estadu hotu-hotu, boot no ki’ik. Ami husu Iraun atu hapara kedas ninia beligerância no hili dalan ho bom senso. Mundu la auguenta ba konflitu seluk tan ne’ebé mosu iha Golfu,” Prezidente Repúblika no Laureadu Nobel ba Pás José Ramos-Horta liuhusi karta ofisiál ne’ebé fó sai husi Palásiu Prezidensiál, TATOLI asesu, kuarta ne’e.
Timor-Leste ezije ba parte hotu atu fila fali ba meza negosiasaun no aproveita oportunidade hotu ba de-eskalasaun. Timor-Leste konsistentemente rekoñese katak diálogu no rekonsiliasaun mak dalan úniku ba estabilidade no futuru ne’ebé di’ak liu.
TATOLI
