VIKEKE, 07 Maiu 2026 (TATOLI)—Diretór Sentru Juventude Munisípiu Vikeke, Januario Benevides de Araújo, hateten Gabinete Apoia Sosiedade Sivíl (GASS) apoiu fundu ba Sentru Juventude Vikeke (SJV) hodi oferese formasaun ba juventude husi postu haat.
“Iha tinan ida-ne’e (2026) ami hetan apoia fundu husi GASS ho totál hamutuk $10.000. Objetivu husi funde ne’e atu oferese formasaun edukasaun sívika ba ita-nia juventude husi postu administrative haat mak hanesan Lakluta, Ossú, Uatulari no Uatukarbau hodi hasa’e sira-nia koñesimentu,” Januario ba TATOLI iha Postu Vikeke Vila, Kinta ne’e.
Januario hatutan joven sira husi kada postu feto no mane hamutuk na’in-25 mak partisipa formasaun ne’e no formasaun ho durasaun durante semana ida.
Kona-ba formasaun ne’e, SJV sei realiza direta iha ba suku mak hanesan Postu Ossú realiza iha Suku Nahareka, Postu Uatukarbau iha Suku Uani-Uma, Postu Lakluta iha Suku Uma-Tolu no Postu Uatulari iha Suku Makadike Uaitame.
“Formasaun ba postu Vikeke Vila tinan ida-ne’e ami la realiza tanba tinan kotuk ami implementa ona, entaun ba tinan 2026 ba fali postu sira-ne’ebé seidauk hetan formasaun,” nia subliña.
Nia esplika katak matéria formasaun kompostu husi prosesu eleitorál, matéria rezolusaun ne’ebé foka ba demokrasia inklui matéria sira seluk SJV prepara hodi oferese ba joven sira.
“Formasaun referidu ita hakarak halo mudansa ba ita-nia joven sira-nia karakter, tanba ita haree Sekretaria Estadu Formasaun Profisionál no Empregu (SEFOPE) rekruta ita-nia joven traballadór sira ba servisu iha rai-li’ur, maibé to’o iha rai-li’ur ne’ebá ita-nia joven sira halo problema. Tan ne’e mak ami hakarak kria formasaun sira-ne’e ba joven sira hodi halo mudansa ba sira-nia karakter, atu joven sira-ne’ebé hakarak buka servisu iha rai-li’ur karik, iha ona hanoin ida nasionalizmu no patriotizmu atu labele hamonu ita-nia nasaun nia dignidade,” nia informa.
Aleinde ne’e, nia dehan, formasaun ne’e mós liga ba prevensaun violénsia sira entre joven no joven sira atu joven sira prevene konflitu, respeita malu, kria pás no establidade.
Entretatu, formasaun ne’e sei realiza iha fulan-Maiu ne’e no formadór ba formasaun referida husi SJV ne’ebé espesífiku ba edukasuan sívika nian.
Jornalista: Vitorino Lopes da Costa
Editór: Xisto Freitas da Piedade
