BOBONARU, 07 Maiu 2026 (TATOLI) – Ministériu Finansa, Ministériu Administrasaun Estatál, no ministeriu relevante sira realiza atividade konsulta públika sidadania iha munisípiu Bobonaru kona-ba elaborasaun Orsamentu Jerál Estadu 2027 ho nia prioridade sira.
Konsulta sidadania hanesan prosesu ida regulár realiza kada tinan antes tama ba siklu preparasaun no submisaun orsamentu fiskál ba tinan tuirmai. Prosesu ida-ne’e atu garante polítika públika, no prioridade orsamentál no hetan informasaun husi sidadaun sira hotu, órgaun soberania, no parseiru sosiál sira, tuir prinsípiu partisipasaun, transparénsia, no foti desizaun bazeia ba evidénsia.
“Aktividade ne’e importante tebes atu rona xefe suku, xefe aldeia, no organizasaun sira hotu nia hanoin, para ita bele hatuur ita-nia hanoin ne’ebé di’ak ba ita-nia Orsamentu Jerál Estadu tinan 2027 nian”, Diretór Planeamentu Ministeriu Finansa, Amilton Amaral Soares Lemos, hateten iha atividade ne’ebé realiza iha salaun Maria Tapó, kinta ne’e.
Prezidente Autoridade Munisípiu Bobonaru, Paulo Moniz Maia, mós konsidera atividade ajuda tebes parte hotu atu entende prosesu tomak no ajuda fórmula dokumentu estratéjiku no sujestaun sira ne’ebé reflete ba situasaun reál.
“Nune’e, OJE 2027 bele responde duni ba área prioridade sira, liuliu orsamentu ne’ebé ajuda atu responde nesesidade bazíka importante balun no fó espasu ba investimentu estratéjku sira bele akontese hodi diversifíka ita-nia ekonomi, nune’e bele kontribui ba ekonomia bele krexe, firme no sustentavel”, nia dehan.
Antigu deputadu ne’e subliña katak Planu Asaun Anuál (PAA) 2026-2027 aposta área prioridade sira ne’ebé kontempla iha Planu Estratéjiku Dezenvolvimentu Munisipál 2026-2030 hanesan instrumentu jestaun ida ne’ebé gia atu la’o tuir no akompaña jestaun ida ne’ebé rigór iha implementasaun liuhusi monitorizasaun husi servisu autoridade munisipál.
“Ida-ne’e ita konsidera atu asegura katak ezekusaun kumpre regra no prosedimentu sira hotu no posibilita atu impaktu ba investimentu sira bele kontribui ba kreximentu ekonomia ida hanesan ho ha’u sita iha ne’e”, nia dehan.
Iha PAA 2027, Bobonaru fó prioridade ba setór estratéjiku sira hanesan dezenvolvimentu ekonomia, sosial, saúde, infraestrutura no turizmu atu hasa’e moris komunidade iha munisípiu referidu.
Jornalista: Sergio da Cruz
Editora: Maria Auxiliadora
