DILI, 07 Maiu 2026 (TATOLI)—Diretór Servisu Saúde Munisípiu Aileu, João de Deus, informa Ministériu Saúde koloka ona profisionál saúde hamutuk na’in-10 mai Munisípiu Aileu maibé seidauk sufisiente hodi halo atendimentu ba komunidade.
“Seidauk sufisiente hodi halo atendimentu ba komunidade tanba ho razaun funsionáriu saúde lubuk ida mak ba asume kna’ar iha Autoridade no Ministériu Saúde,” João de Deus hateten ba Agência Tatoli liuhusi WhatsApp, ohin.
Nia dehan, profisionál saúde na’in-10 ne’ebé mak Ministériu Saúde koloka mai iha Servisu Saúde Munisípiu Aileu ne’e kompostu husi mediku jerál, enfermeiru, parteira no adminsitasaun finansa nian.
“Médiku jerál na’in-rua (2), enfermeiru na’in-haat (4), parteira na’in-tolu (3), administrasaun finansa na’in-ida (1), ne’ebé seidauk sufisiente hodi halo atendimentu ba komunidade,” nia hateten.
Antes ne’e, Vise-Ministru Fortalesimentu Instituisionál Saúde, José dos Reis Mango, hateten profisionál saúde sira-ne’ebé mak foin daudaun Ministériu Saúde halo rekrutamentu hamutuk 200-resin ne’e, koloka hotu ona ba Servisu Saúde Munisípiu no ospitál referál sira-ne’ebé iha Timor-Leste.
“Sira ita Koloka hotu ona ba Munisípiu hotu-hotu no ospitál ida-idak ne’ebé iha Timor-Leste, hodi halo servisu tuir área ne’ebé mak sira hili,” José dos Reis Mango dehan.
Nia afirma, tuir planu Ministériu Saúde atu halo rekrutamentu tan ba profisionál saúde sira maibé depende mós ba orsamentu.
“Tanba ne’e atu halo rekrutamentu foun hein lai tanba ita haree lai ba orsamentu,” nia hateten.
Nia relata, profisionál saúde sira-ne’ebé mak foin liu iha vaga ne’e sei konsentra iha Munisípiu Dili no balun iha Hospitál Nasionál Guido Valadares hodi apoiu ba moras dengue ne’e.
“Sira iha Dili atu apoia ospitál nasionál no mós Munisípiu Dili, nomós sentru saúde Vera Krúz, Bekora, Formoza no Dom Aleixo. Agora iha ne’e la’ós de’it apoiu maibé sira hanesan introdusaun progamátiku, tanba sira ne’e foun entaun sira ba karik pelumenus sira bele hatene ona servisu. Ita halo rekrutamentu maibé sira seidauk iha koñesimentu kle’an kona-ba programa saúde sira,” nia dehan.
Jornalista : Felicidade Ximenes
Editór : Cancio Ximenes
