DILI, 07 Maiu 2026 (TATOLI)—Pelican Paradise Holding Timor-Leste seidauk bele hamamuk ka husik área projetu konstrusaun otél fitun lima iha suku Tíbar, tanba kompañia nafatin iha direitu legál ba rai liuhusi akordu arrendamentu ba tempu naruk ne’ebé sei válidu.
Diretór Pelican Paradise Holding Timor-Leste, Samuel Ong, hateten ba TATOLI katak projetu Pelican Paradise sei kontinua tuir planu, enkuantu hein Governu Timor-Leste atu kumpre ninia obrigasaun pré-rekizitu tuir Akordu Espesiál Investimentu SIA, iha inglés) ne’ebé asina ona iha tinan 2022.
“Projetu Pelican Paradise sei la’o nafatin tuir planu. Ami hein de’it Governu atu kumpre ninia obrigasaun rekizitu tuir SIA ne’ebé asina iha tinan 2022”, Samuel Ong hakerek iha mensajen WhatsApp ba TATOLI.
Deklarasaun ida-ne’e hato’o hodi responde ba deklarasaun Primeiru-Ministru, Xanana Gusmão, iha loron 16 fulan-Abril 2026, ne’ebé ezije empreza atu hamamuk fatin durante loron 10 nia-laran, nune’e área ne’e bele entrega ba investidór seluk nu’udar parte ida husi preparasaun sira ba Simeira ASEAN 2029 nian.
Tuir observasaun TATOLI iha terrenu, laiha atividade konstrusaun ka dezenvolvimentu ne’ebé akontese iha área projetu nian.
Pesoál seguransa balun iha fatin ne’e hateten katak maski iha ona ligasaun eletrisidade, maibé kapasidade enerjia ne’ebé eziste konsidera la adekuadu atu hatán ba nesesidade operasionál sira husi projetu ho eskala boot.
Seguransa pesoál sira ne’e mós esplika katak Pelican Paradise antes ne’e harii ona tanke armazenamentu bee nian ida hodi apoia nesesidade projetu nian. Maibé, bainhira projetu ne’e la’o hela, empreza ne’e tenke sosa bee tanba bee-moos Governu nian seidauk iha.
Tuir pesoál seguransa ne’e, perfurasaun ba bee-matan sira hala’o duni, maibé kapasidade enerjia ne’ebé iha la sufisiente atu opera bomba sira ne’ebé presiza atu bomba bee husi kraik ba área projetu foho leten.
Antes ne’e, iha loron 24 Abríl 2026, Pelican Paradise hasai komunikadu ofisiál ida esplika katak inspesaun independente ida ba fatin projetu nian hetan fornesimentu eletrisidade no bee iha área Tasi-Tolu no Tíbar nafatin la to’o rekizitu mínimu sira hodi apoia dezenvolvimentu ho eskala boot.
Empreza deklara katak fornesimentu eletrisidade atuál la adekuadu atu suporta atividade konstrusaun sira, maski ligasaun elétrika báziku sira instala ona iha fatin.
“Projetu presiza mínimu 0,9 to’o 1 megawatt eletrisidade nian ba konstrusaun. Fornesimentu atuál la to’o besik ba ezijénsia ne’e”, haktuir relatóriu.
Aleinde ne’e, Pelican Paradise subliña katak laiha fonte bee ne’ebé adekuadu iha fatin projetu nian. Fonte bee úniku ne’ebé hetan maka maizumenus kilómetru 2,1 husi área projetu nian no aat ona, laiha ligasaun bomba nian ka kanu distribuisaun nian.
Tuir empreza, situasaun ida-ne’e maka impede dezenvolvimentu ho eskala boot atu la’o, la’ós tanba falta finansiamentu, hanesan hateten ona antes.
Pelican Paradise reklama katak investe ona fundu substansiál iha tinan 17 ikus ne’e iha dezenvolvimentu projetu iha área Tasi-Tolu no Tíbar, inklui taxa konsultoria, estudu ambientál, sukat rai, konstrusaun estrada, obra rai, no konstrusaun galeria unidade demonstrasaun
Kompañia ne’e mós subliña katak nia kaer akordu aluga nian ba tinan 99 ba parsela rai hamutuk 22 iha área projetu nian, ne’ebé maka Estadu fó, no legalmente válidu nafatin.
“Pelican Paradise nia direitu legál sira ba fatin ne’e mantein intaktu. Ami prontu atu harii, maibé ami nunka hetan kondisaun sira hodi halo ida-ne’e”, hateten.
Pelican Paradise hatutan tan katak nafatin iha kompromisu ba dezenvolvimentu iha Timor-Leste no nakloke ba diálogu liuhusi prosesu ne’ebé apropriadu.
Jornalista: Arminda Fonseca
Editora: Maria Auxiliadora
