BAUKAU, 08 Maiu 2026 (TATOLI)—Autoridade Munisipál liuhusi Prezidente Autoridade Munisipál (PAM), Veneranda Eurico Lemos Martins garante sei hasa’e produsaun agrikultura iha Munisípiu Baukau iha futuru.
Prezidente Autoridade Munisipál (PAM) Baukau, Veneranda Eurico Lemos Martins, esplika Autoridade Baukau hamutuk ho Ministériu Agrikultura, Pekuária, Peska no Floresta (MAPPF) hahú konsentra ba setór agrikultura mezmu konsidera seidauk totalmente.
“Ita tenke rekoñese katak balun seidauk maibé neneik no bebeik ita halo, atu fó moris no loron ida ita tenke orgullu bele redús importasaun foos iha Baukau,” Veneranda Lemos hateten iha Sentru Konvensaun Baukau (CCB-sigla portugeza), Vila Antiga, Sesta ne’e.
Eis deputada ne’e relata esforsu Governu hahú kria kondisaun hanesan infraestrutura iha setór agrikultura iha Baukau hanesan konstrusaun irrigasaun Modobuti, Uatuwa (Gariuai), Postu Administrativu Baukau Vila, Waidasu, Galata iha Venilale, Uaigae no Buluto iha área Vemasse ne’ebé konsideradu fasilita sei kontribui ba produsaun haree iha Baukau.
Nia hateten mudansa ne’ebé iha hatudu natar iha área Vemasse ne’ebé antes ne’e abandonadu tinan ne’e agrikultór sira hahú reativa fali tanba esforsu husi entidade hotu liuliu serbisu agrikultura hanesan fasilita tratór no fini ba komunidade.
“Ita tenke hamutuk hanoin ida ba dezenvolvimentu,” Veneranda Lemos enkoraja.
Tuir dadus, totál natar iha Munisípiu Baukau hamutuk ektare 14.423 ne’ebé lokaliza iha postu administrativu ualu hanesan Vemasse, Baukau Vila, Venilale, Laga, Baguia no postu tolu iha Kelikai.
Husi parte to’os Munisípiu Baukau koñesidu ho produsaun batar, fore-rai no ortikura ne’ebé utiliza rai hamutuk ektare 16.000 kompostu iha Baguia ektare 3.347, Baukau Vila ekatare 3.016, Laga 2.372, Kelikai 3.016, Vemasse 1.325 no Venilale hamutuk ekatare 2.902.
Entretantu, totál tratór ne’ebé distribui ba postu ualu hamutuk 31 ne’ebé Postu Vemase sei hetan tratór haat (4), Venilale haat (4), Baucau Vila sia (9), Matebian rua (2), Kelikai Antiga tolu (3), Baguia tolu (3), Laga tolu (3) no Kelikai (3).
Jornalista: Natalino Belo
Editór: Xisto Freitas da Piedade
