DILI, 08 Maiu 2026 (TATOLI)—Ministru Obra Públika, Samuel Marçal, akompañia husi Sekretáriu Estadu Asuntu Toponímia no Organizasaun Urbana, Germano Santa Brites Dias no Sekretáriu Estadu Eletrisidade Água Saneamentu, Santos Noronha, hala’o enkontru ho kompañia internasionál hodi rona sira-nia progresu no difikuldade servisu iha terenu.
Ministru Obra Públika, Samuel Marçal, hateten ohin sira halo enkontru ho setór privadu internasionál sira tanba kompania sira-ne’e kaer projetu boot-boot sira iha territóriu nasionál, signifika katak bainhira projetu boot sira-ne’e la la’o entaun bele afeta ba ezekusaun.
“Projetu hirak ne’ebé kompañia sira-ne’e kaer balun iha progresu, maibé balun enfrenta hela difikuldade iha terenu liuliu kona-ba problema sosiál, klima, materiál pagamentu (payment) no konsultan tékniku,” Ministru Samuel informa ba jornalista sira iha nia kna’ar fatin Kaikoli, ohin.
Nune’e, nia dehan, ohin mak sira rona problema barak tebes ne’ebé kompañia sira levanta mai Governu, liuliu kompañia balun asina ona kontratu maibé seidauk simu pagamentu, balun simu ona pagamentu tanba mudansa sistema fó impaktu ba servisu iha terrenu.
Ohin, ami rona hotu ona kompañia sira-nia problema, ha’u sei hato’o relatóriu ne’e ba Xefe Governu no ami sei ba vizita fatin projetu sira hodi haree diretamente kondisaun reál ida iha terrenu,” nia relata.
Entretantu, enkontru ne’e marka prezensa husi MOP, SEATOU, no kompañia internasionál na’in 20-resin husi nasaun Indonézia, Xina, Japaun no seluk tan.
Jornalista : Alexandra da Costa
Editór : Cancio Ximenes
