KOVALIMA, 08 Maiu 2026 (TATOLI)- Provedoria Direitu Umanu (PDHJ) durante hala’o vizita iha prizaun hodi simu preokupasaun husi prizoneiru sira katak Defensór Públiku sira ladun vizita sira iha iha prizaun sira.
“ Ha’u nia rekomendasaun ba Ministériu Justisa (MJ) tutela ba defensoria publika katak durante ami halo vizita prezu sira levanta kestaun tanba ladun hetan asisténsia husi Defensór Públiku sira no ladun vizita sira-nia kliente bainhira prezu sira atu halo rekursu maibé laiha asisténsia”, Provedór PDHJ , Vigilio Guterres Lamunuka hato’o liuhusi nia diskursu iha resintu prizaun Suai , Ohin.
Ho preokupasaun ne’ebé mak PDHJ simu hodi rekomenda ba Ministériu Justisa atu fó atensaun tuir hodi fó asisténsia ba sidadaun sira ne’ebé mak nia ekonómia labele sustenta.
“Ami husu MJ atu tau atensaun ba Defensor públiku tuir lei hodi asisténsia ba ita-nia sidadaun sira ne’ebé mak ekonomia labele sustenta”, nia dehnan
Ho rekomendasaun husi PDHJ hein katak Defensór sira halo intervensaun maka’as ba sidadaun sira labele hein de’it kazu ba poder ekonomia ho politiku sira ko’alia iha públiku, maibé ladun fó atensaun ba sidadaun baibain sira.
Iha sorin seluk, Diretór Estabelesementu Prizaun Suai, Rui Gonçalves konfirma katak durante ne’e asuntu Defensór sira la vizita nia kliente sai hanesan preokupasaun husi prezu sira iha prizaun.
“Sim baibain ida-ne’e mak sai problema ba ita nia prezu sira hasoru nia Defensór iha momentu julgamentu de’it hafoin sira lahatene ona”, nia dehan
Bazeia lei hateten katak julga sidadaun atu hetan pena husi parte tolu mak hanesan Juiz, Ministériu Públiku no Defensór Públiku tanba durante ne’e rekluzu sira hasoru Defensór durante julgamentu de’it. Ho nune’e, Administradór Defensór Públika hodi halo enkontru ona ho rekluzu sira atu faslita telefone atu kontaktu sira-nia advogadu
Tuir dadus prezu Iha prizaun Suai hamutuk 122 kompostu husi prizaun kondenanu 112 no prizaun preventiva 10 ne’ebé fahe ba bloku A 36,bloku B 37,bloku C 36 no kozinha 13 ne’ebé mai husi munisípiu hanesan Kovalima 54,Ainaro 28 ,Bobonaro 20,Manu fahi 18,Likisa na’in-ida no Baucau na’in-ida.
Jornalista:Celestina Teles
Editór: Florencio Miranda Ximenes
