VIKEKE, 09 Maiu 2026 (TATOLI)—Prezidente Autoridade Munisípiu Vikeke, Francisco C. S. de Gonzaga Soares, informa iha tinan 2026 ne’e Autoridade Munisípiu Vikeke sei implementa projetu Planu Dezemvolvimentu Intgradu Munisipál (PDIM) hamutuk 14 ne’ebé fó prioridade ba konstrusaun irrugasaun no sítiu trístiku sira.
“Tinan ida-ne’e, ita implementa obra hamutuk 14, ne’ebé loke ona konkursu públiku ba ita-nia empreza lokál sira. Ttempu badak, ita sei halo vizita direta ba empreza sira-nia fatin hodi haree empreza sira-nia kondisaun di’ak ka lae, atu ita bele hatene empreza sira-ne’ebé konkorre ba obra PDIM ne’e nia kondisaun,” Autoridade Vikeke ne’e hateten ba jornalista sira iha Postu Administrativu Vikeke Villa, Munisípiu Vikeke, ohin.
Autoridade ne’e relata, obra PDIM hamutuk 14 ne’e sei implementa liuliu ba iha setór agrikultura ne’ebé foku liu ba irrigasaun, saúde no konstrusaun ba fatin turizmu sira-ne’ebé lokaliza iha Munisípiu Vikeke.
“Obra hirak-ne’e ita-nia empreza lokál hamutuk 72-resin mak konkorre ona. Depois prosesu konkursu ne’e ramata, ita hetan ona empreza manán-na’in ba obra 14, ita planeia implementa iha fulan oin sira-ne’e depende ba prosesu konkursu públiku refridu. Nune’e, ba obra 14 ne’e ita preve orsamentu munisipál purvolta rihun $3,” nia informa.
Husi obra sira-ne’e, nia dehan, tau mós imprtansia ba setór agrikultura tanba ne’e konstrui irrigasaun no konstrui armazen ba produtu lokál sira-nian.
“Ita iha mehi ida katak hakarak hasa’e produsaun agríkola, tanba ne’e mak ita konstrui irrigasaun, mezmu uitoan maibé beibeik. Tan ne’e, ba obra sira-ne’ebé ita implementa bele fó benifísiu ba povu munisípiu Vikeke,” nia dehan.
Obra PDIM ba tinan 2026 hamutuk 14 ne’e kompostu husi konstrusaun irrigasaun Laudei Leba Crabi kilométru rua (2) iha Postu Administrativu Uatukarbau, konstrusaun internamentu Uatulari, konstrusaun merkadu Bebui Uatulari, konstrusaun armazen agrikultura no moru ba produtu lokál Vikeke Villa, konstrusaun fatin turizmu istóriku Bahaneo Ossú, konstrusaun postu saúde Loi Ulo, Uatukarbau, reabilita fatin turizmu Uelulimanas Vikeke Villa, konstrusaun Pré-Eskolár Kakatua Lugasa Vikeke Vila.
Obra PDIM ne’e mós, alvu ida mak sein konstrui irrigasun Uaiboru-Naha kilómetru rua (2) konstrusaun fatin turizmu Fabo ba Uetasi Lakluta, konstrusau Postu Saúde Baulale Uatukarbau, konstrusaun irrigasaun tuan ba natar Lafaek Hasan Vikeke Vila, konstrusaun fatin turizmu Didimera Uatulari no konstrusaun Aenau Ossorua kilómetru 2+500 iha Postu Administrativu Ossú.
Jornalista : Vitorono Lopes da Costa
Editór : Cancio Ximenes
