DILI, 9 Maiu 2026 (TATOLI)—Prezidente Repúblika no Laureadu Nobel ba Pás, José Ramos-Horta, hahú nia Vizita Estadu dahuluk ba Papua Nova Giné husi 10-13 Maiu 2026, hodi hametin relasaun entre nasaun rua ne’e no loke kapítulu estratéjiku ida iha sira-nia relasaun bilaterál.
Vizita ne’e koinside ho Simeira Inaugurál Oseanu Melanézia ne’ebé organiza husi PNG iha APEC Haus ho tema “Asegura Protesaun Oseanu ho Ekonomia Oseanu Sustentável.”
Foku prinsipál ida husi vizita ne’e mak atu hametin kooperasaun entre Timor-Leste no Papua Nova Giné—nasaun rua ne’ebé iha interese komún ne’ebé kle’an hanesan nasaun Melanézia no Triángulu Korál.
Bainhira to’o iha Port Moresby iha 10 Maiu, Prezidente Ramos-Horta sei hahú nia programa ofisiál iha 11 Maiu ho vizita kortezia ba Governadór Jerál Papua Nova Giné, Sir Bob Bofeng Dadae, iha Government House.
Iha loron ne’e kedas, Prezidente sei hala’o enkontru bilateral ho Primeiru-Ministru Papua Nova Guiné, Hon. James Marape, iha Melanesian Haus. Líder na’in rua sei diskute kona-ba kolaborasaun prátika iha diplomasia rejionál, governasaun tasi nian, no reziliénsia ekonómika.
Tuirmai Prezidente Ramos-Horta sei partisipa iha almosu Estadu ofrese husi Primeiru-Ministru no Governadór Jerál iha Hilton Hotel. Iha tempu kalan, Prezidente sei sei partisipa iha Jantar Ofisiál ne’ebé ofrese husi Primeiru-Ministru Marape, hodi marka abertura ba Simeira Inaugurál Oseanu Melanézia nian, iha APEC Haus.
Iha 12 Maiu, Prezidente Ramos-Horta sei partisipa iha sesaun plenária Simeira Oseanu Melanézia nian iha APEC Haus, iha ne’ebé líder Melanéziu sira sei halo promesa protesaun oseânika nian ba objetivu biodiversidade globál 30×30 nian.
Prezidente sei hala’o mós enkontru bilaterál ho líder husi nasaun Illa Pasífiku sira seluk iha APEC Haus, tuir mai partisipa iha resepsaun koktel ida ne’ebé organiza husi Governadór Distritu Kapitál Nasionál, Hon. Powes Parkop.
Vizita ne’e reafirma Timor-Leste nia solidariedade ho nasaun melanézia sira kona-ba governasaun oseánika, peska sustentável, no konservasaun marinha nian.
“Timor-Leste bele joven iha nasionalidade, maibé ami antigu iha ami-nia respeitu ba tasi. Simeira Oseanu Melanézia nu’udar farol ba ambisaun koletiva. Timor-Leste hamriik hamutuk ho ita-boot sira—hodi proteje ita-nia patrimóniu azúl, atu asegura ita-nia povu nia moris, no atu garante katak Pasífiku nia fuan kontinua forte ba jerasaun barak sira tuir mai,” Prezidente Ramos-Horta hateten.
Prezidente Ramos-Horta sei konklui nia vizita Estadu dahuluk ba Port Moresby iha 13 Maiu 2026, hafoin Serimónia despedida Guarda de Honra iha Aeroportu Internasionál Jacksons.
TATOLI
