DILI, 10 Maiu 2026 (TATOLI)—Polísia Nasionál Timor-Leste (PNTL) liuhusi Komandu Munisípiu Lautein, detein membru F-FDTL Komponente Terrestre ho inisiál GdS tanba suspeitadu envolve iha kazu omisídiu ne’ebé halakon joven ida-nia vida iha área Poros, Suku Mehara, Munisípiu Lautein.
Kazu ne’e akontese iha área Poros, Suku Mehara, Postu Administrativu Tutuala, Munisípiu Lautein, iha Sabádu (09 Maiu) tuku 02h00 madrugada iha festa kore-metan ida-ne’ebé selebra husi familia iha Aldeia Poros, Suku Mehara, Postu Administrativu Tutuala, Munisipiu de Lautein.
Iha festa ne’e rezulta akontesimentu Ida entre parte festa-nain ho komunidade balun mai husi Asalainu ne’ebé ba asiste mós festa barlake ida iha Aldeia Poros.
Iha festa ne’e, iha mós oknum membru FALINTIL-Forsa Defeza Timor-Leste (F-FDTL) ida naran inisiál GdS ho deviza Soldadu husi Komponente Terrestre mós asiste festa ne’e, nune’e nia suspeitadu provoka iha festa laran no rezultadu to’o konfrontu boot, nune’e to’o joven mane ida hakotu vida.
Hafoin akontesimentu Polísia detein suspeitu sira inklui oknum F-FDTL ida ho inisiál GdS Agora dadaun oknum forsa armada ne’e PNTL asegura ona iha sela Komandu PNTL Munisípiu Lautein hodi submete ba prosesu investigasaun.
Relasiona ho kazu ne’e, jornalista Agência Tatoli tenta konfirma ba Komandante PNTL Munisipiu Lautein, Superintendente Xefe Polísia António do Rego, liuhusi teleónika maibé Komandante refere ninia telemovél fora de área Cobertura ka telefone mate.
Jornalista : Natalino Costa
Editór : Cancio Ximenes
