BOBONARU, 11 Maiu 2026 (TATOLI) – Balkaun Úniku (BU) iha Munisípiu Bobonaru emite ona Billete Identidade (BI) ba sidadaun timoroan na’in-377.
Koordenadora Balkaun Úniku Bobonaru, Cesaltina da Costa, hateten katak atendimentu BI ne’e fó prioridade ba sidadaun ne’ebé halo trata foun no renovasaun, ho kapasidade atendimentu ema na’in-25 kada loron, liuliu ba ema ho defisiénsia, idozu, inan isin-rua no inan foin partu.
“iha Abríl ami prodús ona Billeti Identidade hamutuk 377. Agora iha Maiu ami seidauk rekapitula. Ami iha blanku orijinál, maibé ami atende de’it ba sidadaun sira ne’ebé mai trata foun no ida ne’ebé atu renova. Ba sira ne’ebé sei uza hela surat-tahan mutin válidu kontinua uza lai, expire tiha mak mai renova atu hetan fali orijinál ho blanku ne’e”, nia informa ohin.
Jestora ne’e subliña katak hafoin inaugurasaun edifísuu iha 12 Marsu, Balkaun Úniku halo de’it atendimentu loron tolu no imprime dokumentu 58, tanba problema eletrisidade mate-lakan no liña internét dalabarak avaria.
Relasiona ho atendimentu sertidaun rejistu kriminál, Cesaltina hateten servisu me’e kontinua la’o no atendimentu pasaporte planeia atu hahú fali iha fulan-Maiu ne’e.
“Rejistu kriminál ne’e mak mai iha ne’e menus loos, tanba iha notariadu mós halo atendimentu la limita ema. Ami iha ne’e atende loron rua de’it. Kona-ba pasaporte, depende ba oráriu husi nasionál. Iha Abríl ita laiha atendimentu pasporte, maibé iha Maiu planu atu loron rua ba atendimentu pasporte. Ami ho notariadu sei koko lai kámara moos ka la’e, tanba pasaporte ne’e dokumentu importante loos. Se foto la moos bele prejudika ema nia viajen bá rai-li’ur”, nia dehan.
Kona-ba atemdimentu sira, koordenadora ne’e dehan Balkaun Úniku sei hasoru problema falta rekursu umanu, tanba iha funsionáriu na’in-lima de’it.
“Maibé tekniku notariadu mak funsionáriu menus. Dadeer sira mai serbisu iha ne’e, loraik sira sei bá atende fali sidadaun sira. Ida-ne’e dalaruma komunidade mai husi foho ne’e susar, tanba ita-nia kondisaun estrada moos la di’ak. Sira mai husi postu Loloto’e, Bobonaru, dalaruma mai tarde tiha, loraik laiha atendimentu. Hakarak ka lakohi sira tenke deskansa kalan ida iha ne’e, dadeer mak mai trata fali dokumentu”, nia dehan.
Komunidade husi Marobo, Pedro Lelo Resi Moniz, kontente tanba Balkaun Úniku fasilita ona blaku BI orijinál ba komunidade.
Pedro rekomenda ba Governu atu aumemta númeru funsionariu notariadu no halo atendimentu móvel to’o postu administrativu no suku sira hodi fasilita komunidade asesu ba dokumentus importante ho lalais no besik liu.
“Ami katuas ho ferik la’o labele. Ami la’o do’ok, sai kalan boot foin to’o iha ne’e, selu transporte mais ou menus $10 hanesan ne’e”, nia dehan
Establesimentu Balkaun Úniku ne’e atu hakbesik prestasaun servisu ba sidadaun sira, moderniza no simplifika servisu atendimentu ba públiku ho lalais no fásil, no promove transparénsia hodi bele lori governasaun besik liu ba povu.
Instalasaun foun iha Bobonaru ne’e lori servisu governamentál sira neʼebé krítiku inklui kartaun identidade (BI), pasaporte, no sertidaun kriminál ba komunidade rurál sira, hodi hamenus tempu, kusta, no todan bá viajen ba sidadaun sira ne’ebé hela dook husi kapitál.
Notísia relevante: PM inaugura Balkaun Úniku hodi garante servisu efisiente ba povu Bobonaru
Jornalista: Sergio da Cruz
Editora: Maria Auxiliadora
