DILI, 11 Maiu 2026 (TATOLI)—Dirasaun Nasionál Transporte Terrestre (DNTT) durante ne’e rejista mikrolete 01 to’o 13 ne’ebé ativu halo operasaun iha sidade Dili ne’e hamutuk 859 no ida mikrolete hirak ne’ebé la ativu ne’e hamutuk 199.
“Mikrolet ne’ebé ativu husi 01 hamutuk 74, mikrolete 02 iha 65, mikrolete 03 totál 75, mikrolete 04 iha 38, mikrolete 05 iha 78, mikrolete 06 hamutuk 55, mikrolete 07 iha 40, mikrolete 08 iha 28, mikrolete 09 hamutuk 59, mikrolete 10 hamutum 204, mikrolete 11 iha 75, mikrolete 12 totál 17 no mikrolete 13 iha 51,” Diretora Diresaun Nasionál Transporte Terrestre (DNTT), Maria Antónia Vitor da Costa, informa ba Agência Tatoli iha nia kna’ar fatin Balide, Ohin.
Enkuantu, mikrolete ne’ebé la ativu hamutuk 199 ne’ebé kompostu husi mikrolete 01 iha 32, mikrolet 02 iha 12, mikrolete 03 totál sia (9), mikrolete 04 iha haat (4), mikrolete 05 iha 25, mikrolete 06 hamutuk ualu (8), mikrolete 07 iha sia (9), mikrolete 08 iha lima (5), mikrolete 09 hamutuk 16, mikrolete 10 hamutum 59, mikrolete 11 iha tolu (3), mikrolete 12 totál iha ualu (8) no mikrolete 13 iha sia (9).
Durante ne’e, nia dehan, DNTT seidauk halo rejista ba transporte públiku foun maibé iha mudansa ba dadus mirkolete sira tanba balun la ativu ona, entaun númeru ne’ebé antes ne’e ativu rejista 862 tun fali ba 859.
Mikrolete 08 aumenta sirkulár (rute) ba Lahane
Aleinde ne’e, Diretora Diresaun Nasionál Transporte Terrestre (DNTT) ne’e informa katak mikrolete 08 ninia sirkulasaun ne’e dezde uluk kedas halo operasaun mós ba iha Lahane, maibé ikus-ikus ne’e motorista sira la halo tuir sirkulár (rute) tanba kondisaun dalan ne’ebé aat.
“Agora ami organiza ona motorista sira hodi kontinua halo operasaun to’o ospitál Lahane, tanba agora daudaun mós ospitál ne’e reativa fali ona, entaun komunidade barak hakarak asesu,” nia dehan.
Signifika, nia dehan, mikrolete 08 nia sirkulár (rute) nafatin maibé agora aumenta tan sirkulasasun ba iha Lahane.
Entretantu, nia hateten, prosesu atu moderniza transporte públiku iha dalan protokolu ne’e Governu nafatin planeia, maibé seidauk bele implementa tanba sei iha prosesu alargamentu estrada.
“Alternativa atu moderniza transporte públiku uza bus ne’e hodi redús engrafamentu iha kapitál Dili, no hamenus kadeira pasajeiru mikrolete nian. Ida-ne’e la’ós difikulta operasaun mikrolet nian, maibé atu garante mós seguru ba pasajeiru sira. Ne’ebé, ita sei moderniza duni transporte públiku,” nia hateten.
Jornalista : Alexandra da Costa
Editór : Cancio Ximenes
