DILI, 11 Maiu 2026 (TATOLI)–Konfederasaun Desportiva Timor-Leste (CDTL, sigla portugés), segunda ne’e, selebra ezistensia Konfederasaun Desportiva Timor-Leste ba da-25 ho tema “Tinan Osan Mutin”.
Prezidente CDTL, Afrânio Amaral, hateten Ezisténsia CDTL durante tinan 25 ne’e la’ós tempu badak maibé durante viajen kareira ne’e, CDTL hatudu ona prestasaun ida-ne’ebé mak importante tebes hodi harii, haburas no dezenvolve ona desportu iha Timor-Leste.
“Ita Atinje ona prestasaun lubuk-ida tantu iha nivel nasionál, rejionál no internasionál, ida-ne’e labele haketak husi serbisu maka’as husi federasaun, treinadór, atleta sira hamutuk ho ita- nia Governu liu-husi Ministeriu Juventude Desportu Arte no Kultura (MJDAK) no komunidade hotu,” Afrânio hateten iha Jináziu Dili.
Prezidente CDTL ne’e hatutan, aniversáriu ba da-25 nu’udar mós momentu oportunu ida ba hotu-hotu atu avalia saida mak atinje ona no prepara planu stratéjiku hodi dezenvolve desportu nasional, hadi’a konsiderasaun atleta sira atu nune’e sira bele kompete ho dignidade iha nivel nasionál no internasionál.
“Dezafiu sira iha oin konserteza la’ós fásil, tanba ne’e ita presiza hadi’a profisionalizmu ba iha ita-nia federasaun, hametin sinerjia entre federasaun nasionál sira hamutuk ho ita-nia Governu,” nia dehan.
Afrânio afirma tan, hamutuk ho espíritu luta nian ne’ebé maka’as, fiar katak CDTL ho federasaun desportiva sira hamutuk ho Governu sei kontinua prodús atleta sira funsiona ho di’ak ne’ebé sei lori onra no gloria ba nasaun ida-ne’e,” nia hateten.
Jornalista : Hortencio Sanchez
Editór : Cancio Ximenes
