VIKEKE, 11 Maiu (TATOLI)—Xefe Suku Laline, Postu Administrativu Lakluta, Munisípiu Vikeke, Zaquiel dos Reis de Carvalho, informa daudaun ne’e folin foos kilógrama 25 sa’e ba $25.
“Foos kilógrama 20 ho presu $20 no kilógrama 25 ho presu $25 tanba impaktu udan boot iha-ne’ebé karreta sira asesu bá ami-nia suku difisil tebes tanba estrada aat. Tan ne’e mak folin foos sa’e hodi difikulta komunidade ne’ebé ekonomia ki’ik sira. Antes ne’e, kilógrama 25 ho presu $18,5 no kilógrama 20 ho presu $17,” Zaquiel TATOLI iha Postu Lakluta, Segunda ne’e.
Nia prefere Sentru Lojístika Nasionál (CLN-sigla portugeza) presiza halo intervensaun foos, atu populasaun parte Laline no suku seluk ne’ebé iha postu Lakluta bele sosa hodi aguenta ba komunidade nia moris liuliu iha tempu udan ida-ne’e.
Notísia relevante: MKI: Presu foos sei normál hela
“Kada tinan ami sempre husu ba Governu liuhusi CLN halo intervensaun foos, ne’ebé ba tinan ida-ne’e ami hakarak husu CLN kontinua mai halo intervensaun ba foos tanba foos ne’ebé fa’an presu $12.00, entaun ita-nia komunidade iha kibi’it hodi sosa para konsume iha tempu udan,” nia akresenta.
Nune’e mós, nia husu Governu fó-atensaun ba estrada no ponte ne’ebé liga ba Suku Laline atu komunidade bele asesu tanba kada tinan iha tempu udan estrada no mota sempre difikulta komunidade nia movimentu sira.
Entretantu, estrada liga ba suku ne’e tenke hakur mota We Aas, We Leu, We Dora, Derok Oan, mota Kao. Mota hirak-ne’e seidauk iha ponte, nunee sai risku ba komunidade tanba distánsia husi Postu Lakluta Vila ba Suku Ahik no Laline kuaze kilómetru 17.
Tuir dadus, Suku Laline iha aldeia lima (5) kompostu husi Aimeti-Hun, Fatu-Kedo, Mau-Ama, Mikradek no Santu António, ne‘ebé ho totál populasaun liu ema na’in-943.
Jornalista: Vitorino Lopes da Costa
Editór: Xisto Freitas da Piedade
