DILI, 11 Maiu 2026 (TATOLI)–Diretór Selesaun Nasionál Federasaun Futeból Timor-Leste (FFTL) João Maneco, informa jogu rua ne’ebé Timor-Leste sei enfrenta kontra Brunei Darusalam ba kualifikasaun kopa ASEAN Hiunday, sai sasukat ida hodi deside treinadór prinsipál José Pedro Alves Salazar nia destinu, tanba iha jogu sira liu ba kotuk la hatudu prestasaun di’ak.
“Loos! Nia rasik hatene ona katak jogu rua ne’e importante. Ita hatene katak iha tinan sira kotuk kuandu kualifikasaun ita sempre manán Brunei, maibé rekor ida-ne’e mak la atinje, se lae pois mak haree no foti desizaun,” João hateten ba jornalista sira iha edifisiu FFTL, segunda ne’e.
Nia dehan, nivel ezekutivu FFTL halo ona avaliasaun ba treinadór José Pedro Salazar nia prestasaun, maibé labele foti desizaun agora tanba Timor-Leste sei enfrenta hela jogu importante hanesan kualifikasaun ASEAN Hyundai.
“Nivel ezekutivu halo ona avaliasaun ba treinadór ne’e nia servisu, saida mak nia konkista durante ne’e. Maibé ezekutivu deside fó tan oportunidade ba nia liuliu atu asegura jogu rua ne’ebé ita atu enfrenta ho Brunei Darusalam, tanba sei joga leg primeiru no leg segundu. Razaun ida mós tanba ita haree ba tempu, se tempu ne’ebé badak ita atu halo mudansa iha ekipa tékniku hanoin fó risku ne’ebé boot tebes, ho ida-ne’e mak FFTL sei fó oportunidade ba nia liuliu iha jogu rua ne’e,” nia dehan.
Antes ne;e, treinadór José Pedro hala’o nia kna’ar efetivu iha fulan-Setembru 2025 no sei termina iha Setembru tinan-2026 ne’ebé tuir kláuzula halo estensaun, hatudu prestasaun iha jogu kompetisaun AFC no AFF inklui fó asisténsia iha departamentu tékniku liuliu dezenvolve jogadór juvenil hanesan dezenvolve kurríkulu futeból.
Maibé iha jogu tolu (3) ba kotuk ne’e, Timor-Leste kontra Maldivas, Tazakistaun no Filipina la hatudu prestasaun di’ak ho nune’e jogu kualifikasaun kontra Bruinei mak la susesu FFTL sei hapara kontratu ho treinadór Portugeza ne’e.
Tuir orariu ne’ebé fó sai ona katak iha loron 02 fulan-Juñu leg primeiru hala’o iha Timor-Leste no leg segundu iha loron 09 fulan-juñu iha Brunei Darusalam.
Entretantu, treinadór José Pedro moris iha 18 Outubru 1978, nu’udár eis jogadór koñesidu ho naran Zé Pedro. Nia mós eis jogadór profisionál iha klube sira hanesan Montijo, Barreirense, Boavista no ikus iha klube Alcochetense.
Ninia karreira treinadór iha klube Alcochetense (2014-2016), Belenenses (2018), Sporting CP (2019-2020), Famalição (2021) no AEL Limassol (2022) nu’udár asistente jestór, B-SAD (2023), Vitória Setúbal (2023-2024) no Alverca (2024).
Jornalista : Hortencio Sanchez
Editór : Cancio Ximenes
