DILI, 11 Maiu 2026 (TATOLI) – Ministériu Agrikultura, Pekuária, Peska no Floresta (MAPPF) prevee, iha tinan ne’e, orsamentu hamutuk rihun $60 sosa fini modo husi Indonézia.
Diretór Nasionál Agrikultura, Ortikultura no Protesaun Planta, Lúcio Nuno, hateten sosa fini kada tinan ne’e programa Governu nian atu apoia grupu agrikultór sira hodi hamoris ekonomia família nian.
“Fini modo ne’ebé ita sosa mak hanesan tomate, berinjela, fore-talin, mostarda, repollu, baria, no seluk tan”, Lúcio Nuno hateten ba Tatoli, ohin.
Nia esplika katak fini ne’ebé ministériu sosa sei entrega ba Serbisu Agrikultura iha munisípiu sira mak sei distribui ba agrikultór sira ka grupu sira ne’ebé atu kuda, liuliu iha munisípiu Ainaru, Likisá no Aileu, tanba fatin sira ne’e mak iha poténsia ba produsaun modo.
Ba fini sira ne’ebé distribui, ekipa husi ministériu sei halo monitorizasaun iha terrenu hodi haree nia progresu.
Aleinde ne’e, rezultadu husi fini sira ne’ebé agrikultór sira prodús sei lori bá merkadu ida-ne’ebé harii husi Korea International Cooperation Agency (KOICA) hanaran HADALA. Ida-ne’e sai hanesan sentru ida hodi akumula modo sira ne’e depois buka nia merkadu no barak liu responde ba merenda eskolár.
“Ita hotu hatene HADALA nia funsaun ne’e mak oinsá liga ba merkadu, katak husi agrikultór ka produtór sira mai akumula iha fatin HADALA mak sira liga ba merkadu”, nia esplika.
Kona-ba prosesu akizisaun ba fini sira, daudaun iha hela aprovizinamentu atu loke konkursu públiku.
Jornalista: Arminda Fonseca
Editora: Maria Auxiliadora
