DILI, 12 Maiu 2026 (TATOLI)—Prezidente The Japan-Australia Business Co-operation Committee (AJBCC), Michiaki Hirose, tersa ne’e, hasoru malu ho Primeiru-Ministru Kay Rala Xanana Gusmão hodi hato’o interese atu apoia dezenvolvimentu ekonómiku Timor-Leste liuhusi loke sentru formasaun iha área negósiu.
“Ami hasoru malu ho Primeiru-Ministru, ko’alia kona-ba kestaun ekonomia Japaun no Timor-Leste nian, ami iha interese hakarak loke formasaun kona-ba negósiu ba joven sira,” Michiaki Hirose hateten ba jornalista sira hafoin ramata enkontru ho Xefe Governu iha Palásiu Governu.
Timor-Leste ho Japaun iha relasaun amizade ne’ebé forte tebes no estabelese ona kooperasaun iha área oioin, maibé The Japan-Australia Business Co-operation Committee mós iha interese hakarak apoia hodi hadi’a di’ak liután área negósiu, nune’e hamutuk dezenvolve liután ekonomia Timor-Leste.
AJBCC estabelese ho vizaun jerál ida mak promove no hasa’e oportunidade negósiu no hametin ligasaun entre Austrália ho Japaun bá benefísiu membru sira no mós komunidade internasionál.
AJBCC harii iha tinan 1962 atu promove liután kooperasaun entre nasaun rua no sira-nia komunidade emprezariál sira.
Enkontru ne’e, Prezidente The Japan-Australia Business Co-operation Committee, Michiaki Hirose akompañadu husi Embaixadór Japaun iha Timor-Leste, Yayushi Yamamoto.
Jornalista : Hortencio Sanchez
Editór : Cancio Ximenes
