VIKEKE, 12 Maiu 2026 (TATOLI)—Autoridade Protesaun Sivíl (APC-sigla portugeza) Munisípiu Vikeke, Cirílio Soares Gomes informa, hahú husi fulan-Janeiru to’o Maiu 2026 ne’e, APC rejista uma hamutuk 42 afetadu ba dezastre naturál iha Munisípiu Vikeke.
“Kona-ba dezastre naturál ne’ebé akontese hahú husi fulan-Janeiru to’o Maiu ne’e ita rejistu ona uma hamutuk 42 sai afetadu kauza husi anin boot no rai halai (erosaun) no inséndiu ne’ebé afeta ba ita-nia komunidade,” Cirílio Soares Gomes ba TATOLI iha Postu Vikeke Vila, Tersa ne’e.
Nia esplika tipu uma ne’ebé hetan estragu kompostu husi dapur hamutuk 20 no uma hela hamutuk 22.
“Uma-kain 20 mak sei hetan materiál rekuperasaun, enkuantu seluk ne’e hetan hetan de’it pakote ai-han emerjénsia. Uma-kain 20 ne’ebé atu hetan materiál rekuperasaun ne’e ami aprezenta ona ba nasionál hodi kontinua prosesa,” nia hato’o.
Cirílio informa pakote emerjénsia ne’e ba família uma-kain 42 APC distribui hotu ona kompostu husi foos, mina, masin-midar, biskuit, sardina, kafé no pakte emerjénsia sira seluk.
Iha oportunidade ne’e, nia apela ba populasaun Munisípiu Vikeke hadook an husi fatin risku sira liuliu mota no ai-hun boot sira tanba agora daudaun ne’e tempu udan boot, presiza atensaun ba fatin sira-ne’ebé risku atu labele afeta ba ema-nia vida.
Jornalista: Vitorino Lopes da Costa
Editóra: Xisto Freitas da Piedade
