DILI, 12 Maiu 2026 (TATOLI)—Ministra Saúde, Elia dos Reis Amaral, informa konstrusaun edifísiu pediatria andar lima iha Hospitál Nasionál Guido Valadares (HNGV) daudaun ne’e atinje ona 86%.
Kontrusaun edifísiu pediatria andar lima ne’e loloos entrega ona iha fulan-Maiu, tanba buat balun ne’ebé mak sei kompleta tan, nune’e tempu badak empreza CCECC sei entrega ba Governu.
“Loloos fulan-Maiu ne’e empreza entrega kontrusaun edifísiu pediatria andar lima ne’e ba HNGV, maibé iha ekipamentu balun seidauk to’o no balun daudaun ne’e sei ona dalan, ne’ebé ita hein uitoan. Tanba, ohin, ami observa fatin iha mudansa balun presiza atu halo, entermu instalasaun ami hadi’a buat balun iha ne’eba. Tampu badak, ha’u sei informa bainhira mak atu bele halo operasaun ba iha kontrusaun edifísiu pediatria ida-ne’e rasik,” nia esplika.
Nia informa, ekipamentu iha oin rua (9) mak sei mai hanesan médiku no nonmédiku ne’ebé mak agora daudaun iha ona dalan mai Timor-Leste.
Antes ne’e , Ministra Saúde, Elia dos Reis Amaral, hateten konstrusaun edifísiu pediatria andár lima iha Hospitál Nasionál Guido Valadares (HNGV) daudaun ne’e atinje ona 70%, tanba ne’e iha tempu badak empreza China Civil Engineering Construction Corporation (CCECC) sei entrega ba Governu no sei bele utiliza.
“Progresu ba oin, ha’u hanoin la’o ona. lha semana rua liuba ne’e, ita iha 68%. Ha’u hanoin agora ita iha ona mais 70% resin,” Élia dos Reis Amaral hateten ba jornalista sira hafoin partisipa iha reuniaun Konsellu Ministru iha Palásiu Govenu.
Nia dehan, daudaun ne’e sira akompaña hela instalasaun oksijéniu no ba iha instalasaun ekipamentu médiku no naun médiku sira, nune’e bele utiliza ona.
‘Ita mós hein akompaña mós instalasaun oksijéniu ho mós ba iha instalasaun ekipamentu médiku no naun ekipamentu médiku ne’ebé mak ita espera katak iha tempu badak ita sei halo instalasaun. Atu nune’e, ami sei informa fali ba ita-boot sira bainhira mak bele entrega no bele utiliza ka operalizasaun ba iha ospitál refere. Kona-ba ekipamentu daudaun ne’e iha hela prosesu nian laran,” nia dehan.
Konstrusaun edifisiu pediatria andar lima iha HNGV ne’e konstrui husi empreza China Civil Engineering Construction Corporation (CCECC) ne’ebé Governu Konstitusionál da-ualu (VIII) liuhusi Ministériu Saúde kontrata ho orsamentu hamutuk millaun $9,5.
Jornalista : Felicidade Ximenes
Editór : Cancio Xiemenes
