DILI, 13 Maiu 2026 (TATOLI)—Ministra Saúde, Elia dos Reis Amaral, hateten Ministériu Saúde sei koordena ho ospitál sira iha rai-li’ur antes transfere pasiente sira ba halo tratamentu iha rai li’ur, tanba ospitál sira-ne’e iha regra rasik.
“Ami sei halo kordenasaun ho ospitál sira iha rai-li’ur hanesan Malázia no Singapura antes halo transferénsia pasiente, tanba ospitál sira mós iha regra. Hanesan ita hatene katak pasiente mai ho moras kankru nia iha progresaun. Se inísiu moras ne’e mosu, entaun presiza tratamentu mais antisipa, normalmente ita koordena ho ospitál rai-li’ur. Agora daudaun lista pasiente sira hamutuk 40. Segunda Feira semana oin, ha’u foin aprova tan na’in-10 husi ospitál rai-li’ur, ita sei respeita regra ne’ebé mak iha,” Élia dos Reis Amaral hateten ba jornalista sira hafoin ramata reuniaun KM iha Palaziu Governu, ohin.
Nia relata, bainhira moras sira-ne’e avansadu tebe-tebes ona, bele halo tratamentu paliativu iha rai-laran.
“Bainhira ita haruka pasiente ida ba li’ur, presiza koordena ho ospital rai-li’ur. Ita labele tuir ita nia hakarak, tanba ospital rai-li’ur sira iha regra iha ne’eba, tanba ne’e pasiente sira-ne’ebé mak lista junta médiku haruka ba ne’e balun moras kankru, balun moras kardiaku. Nia númeru loloos husi moras sira-ne’e la lembra didi’ak, maibé kazu maioria moras sira-ne’e mak barak,” nia hateten.
Jornalista : Felicidade Ximenes
Editór : Cancio Ximenes
