DNTT la taka lisensiamentu “guia da marcha” ba viatura ultrapasa fronteira terrestre
DILI, 13 Maiu 2026 (TATOLI)—Xefe Departamentu Sekretariadu Apoiu Tékniku-Administrativu DNTT, Nelson Sequeira, hateten DNTT seidauk simu karta ofisiál husi Ministériu Negósiu Estranjeiru no Kooperasaun atu taka provizóriu lisensiamentu guia da marcha ba viatura ka timoroan sira-ne’ebé hakarak ultrapasa ba fronteira terrestre.
“Ha’u mós hetan informasaun ida husi konsuladu dehan DNTT hapara provizóriu ba guia de marcha husi Timor-Leste ba Indonézia ne’e laloos,” Diretór ne’e informa ba Agência Tatoli liuhusi telefónika, ohin
Nia dehan, tanba ne’e sira atualiza de’it informasaun ba maluk sira timoroan sira-ne’ebé hakarak ultrapasa fronteira Indonézia uza veíkulu ne’ebé sosa husi Indonézia la’o ho kuidadu no sente la nesesáriu lalika hala’o viajen.
“Tanba mosu ona problema debt collector prende veíkulu hamutuk 13 iha provínsia Atambua no Kupang, nune’e kazu hirak ne’e konsuladu Timor-Leste iha Kupang sei ajuda hela rezolve problema ne’e,” nia informa.
Iha oportunidade ne’e, nia haktuir, konsuladu Timor-Leste iha Kupang rekomenda ba DNTT atu taka provizóriu lisensa guia da marcha to’o problema ne’e rezolvidu. Maibé, hafoin ne’e DNTT halo konsultasaun ho superiór sira katak DNTT tenke hein karta ofisiál husi MNEK foin bele taka provizória ba lisensa guia da marcha.
“Entaun, tanba ami seidauk simu karta ofisiál entaun ami kontinua emite lisensiamentu guia da marcha ba timoroan sira-ne’ebé hakarak ultrapasa fronteira,” nia dehan.
Nia mós hatutan, kona-ba tarifa lisensiamentu ba guia da marcha sira sei halo mudansa iha fulan-Juñu tuir dekretu-lei nú. 17/2026, ne’ebé promulga iha Jornál da Repúblika, hanesan tarifa $5 ba semana rua nian sei hasa’e ba $10, no tarifa $10 ba fulan ida nian sei hasa’e ba $40 no viatura Estadu sei selu hotu tarifa, maibé sira-nia tarifa lahanesan ho viatura baibain maizumenus $10.
“Kritéria atu trata lisensiamentu guia da marcha mak hanesan motorista tenke submete dokumentus sira hanesan karta inspesaun veíkulu ne’ebé válidu, karta kondusaun válidu no pasaporte,” nia hateten.
Enkuantu, durante ne’e DNTT simu pedidu lisensiamentu ba guia da marcha husi viatura privadu no viatura Estadu iha tinan 2025 hamutuk 34.620.
Jornalista : Alexandra da Costa
Esitór : Cancio Ximenes
