Governu aprova rezolusaun atu hametin seguransa públika-prevene violénsia iha TL
DILI, 13 Maiu 2026 (TATOLI)—Governu liuhusi reuniaun Konsellu Ministru, kuarta ne’e, aprova projetu Rezolusaun Governu kona-ba medida sira atu hametin seguransa públika no prevene violénsia.
Desizaun ida-ne’e mosu hafoin insidente violénsia sira-ne’ebé rejista iha semana hirak ikus ne’e iha fatin oioin iha nasaun ne’e, ne’ebé envolve grupu joven sira no ho konsekuénsia maka’as ba integridade fízika sidadaun sira-nian, ba propriedade privada nomós ba estabilidade husi komunidade ne’ebé afetadu.
Nune’e, insidente sira-ne’e sai grave liu iha loron 10 fulan-Maiu iha Mehara, Postu Administrativu Tutuala, Munisípiu Lautein, ne’ebé konfrontu ida envolve grupu joven sira-ne’ebé bele halo sidadaun ida mate.
Ministru Interiór, Francisco da Costa Guterres, hateten ohin sira aprova rezolusaun ida-ne’ebé husu ba PNTL no F-FDTL sira atu halo patrullamentu rutina nomós halo diálogu ne’ebé enolve líder komunitáriu no komunidade inklui joven sira atu asegura konflitu iha sosiedade nia leet.
“Inisiativa diálogu ne’e atu ko’alia ho joven sira bainhira mosu problema ruma karik buka malu rezolve labele uza violénsia agresaun fíziku,” Ministru ne’e informa ba jornalista sira iha Palásiu Governu, ohin.
Nia dehan, patrullamentu ne’e ho medida ne’ebé mak polísia sira iha no sei reforsa tan, maske iha suku sira destaka ona membru Ofisiál Polísia Suku (OPS) hodi halo monitorizasaun ba situasaun, karik suku ne’ebé presiza patrullamentu entaun ekipa sei tun direta karik la presiza entaun sei kontrola husi membru OPS rasik.
Nune’e, ohin Governu kondena ho forma klara no maka’as ba aktu destruisaun hotu-hotu ba sasán ne’ebé halo ema lakon vida, ofensa ba integridade fízika sidadaun sira-nian ka estragu propriedade privada, la haree ba sé mak autór ka ninia razaun sira.
Entre medida sira-ne’ebé aprova ona, Governu reafirma suspensaun temporáriu, iha territóriu nasionál tomak, atividade koletiva ensinu aprendizajen no prátika arte marsiál no arte rituál sira, nune’e mós taka fatin sira-ne’ebé uza hodi hala’o atividade hirak-ne’e.
Tanba medida ida-ne’e iha karáter exepsionál, proporsionál no preventivu ho objetivu atu hapara uzu aproveitamentu husi atividade sira-ne’e nu’udar dalan ida hodi organiza aktu violentu sira.
Rezolusaun Governu ne’e mós determina reforsu operasaun patrullamentu husi Polísia Nasionál Timor-Leste iha territóriu nasionál tomak, liuliu iha área no oráriu ho konsentrasaun boot tebes husi joven sira ka ho istória violénsia nian, no mós husu kolaborasaun husi líder komunitáriu, liuliu Xefe Suku no Xefe Aldeia sira, hodi relata situasaun sira kona-ba suspensaun atividade ne’ebé relasiona ho arte marsiál no arte rituál.
Autoridades munisípiu, Rejiaun Administrativa Espesiál Oekusi Ambenu no Autoridade Administrativa Ataúru nian tenke garante atu hatutan kedas informasaun sira-ne’e ba autoridade polísia kompetente sira.
Rezolusaun ne’e mós determina atu autoridade polísia sira kontinua no aselera investigasaun ne’ebé la’o hela relasiona ho insidente violénsia neʼebé verifika tiha ona, no atu ninia autór sira tenke responsabiliza tuir lei.
Jornalista : Alexandra da Costa
Editór : Cancio Ximenes
