DILI, 13 Maiu 2026 (TATOLI)—Ministériu Saúde asina akordu ho Brunei Darussalam atu halo kapasitasaun ba rekursu umanu hodi bele hasa’e koñesimentu iha área saúde nian.
“Loos duni, foin daudaun ami asina akordu ida ho nasaun Brunei Darussalam ne’e objetivu prinsipál husi akordu kooperasaun mak liu ba kapasitasaun ba rekursu umanu atu hametin sistema saúde nasionál,” Elia dos Reis hateten ba jornalista sira iha HNGV, ohin.
Nia relata, asina akordu ne’e entre Timor-Leste ho nasaun Brunei Darussalam hodi fó apoiu tomak ba setór saúde iha Timor-Leste bainhira tama iha ASEAN nian.
“Husi kooperasaun ida-ne’e di’ak tebe-tebes oinsá ita bele eleva koñesimentu profisionál saúde sira-nian liuliu hanesan médiku, infermeiru no parteira sira,” nia hateten.
Nia informa, akordu ida ne’e foku ba fahe koñesimentu tékniku, treinamentu profisionál saúde, dezenvolvimentu kapasidade médiku no espesialista no promove servisu saúde ne’ebé di’ak-liu tan ba povu.
“Kooperasaun ho Brunei importante tebe-tebes, tanba nasaun refere ida-ne’e iha esperiénsia no sistema saúde ne’ebé avansadu iha rejiaun ASEAN. Nune’e, Timor-Leste bele aprende husi esperiénsia Brunei atu hadi’a atendimentu saúde iha ospitál no sentru saúde sira iha rai-laran. Oinsá bele hadi’a ba sira kapasitasaun profisional atu nune’e bele halo atendimentu ba publiku,” nia informa.
Nia haktuir, liu husi akordu ne’e mos espera bele loke oportunidade ba doutór no profisionál saúde Timoroan sira atu tuir formasaun espesializadu iha Brunei, liuliu iha área ne’ebé Timor-Leste seidauk iha tratamentu moras króniku, pedriatria no área médika espesializada sira seluk.
Jornalista : Felicidade Ximenes
Editór : Cancio Ximenes
