BAUKAU, 13 Maiu 2026 (TATOLI)—Sidadaun feto ho inisiál EX idade 62 husi Suku Gariuai, Postu Administrativu Baukau Vila suspeita kontaminadu vírus raiva.
Diretór Klínika Ospitál Rejionál Eduardo Ximenes (HoREX-sigla portugeza) Baukau, Francisco Mouzinho da Costa Belo, esplika EX atualmente hala’o tratamentu iha HoREX iha-ne’ebé asu tata parte ain-karuk iha loron (08/03/2026) nune’e hetan kedas tratamentu hanesan konsume ai-moruk antibiótiku no kose ai-moruk iha ain maibé iha loron Kinta (07/05/2026) médiku sira deteta iha sintoma raiva.
“Nia sintoma hanesan rabies (raiva) , mak ami suspeita ba rabies. Nia amostra parte vijilánsia nian lori ona bá Dili. Ita hein nia rezultadu,” Diretór Klínika HoREX Baukau, Francisco Mouzinho da Costa Belo hateten iha nia knaar fatin, Vila Nova, Kuarta ne’e.
Francisco da Costa relata vítima bainhira akontese asu tata mezmu hala’o tratamentu maibé parte médiku sira la fó vasina raiva tanba laiha stock vasina nian.
Aleinde ne’e, pesoál saúde iha HoREX la halo teste ba raiva no orienta fó alta ba sidadaun ne’e husi sala baixa no sujere atu hakbesik an ba sentru saúde nune’e bele hetan vasina.
“Pasiente ne’e nia kondisaun jeralmente di’ak hela. Agora daudaun tratamentu iha ospitál hela,” Mouzinho akresenta.
Tuir informasaun, kazu raiva iha Baukau sa’e ona ba 14 iha-ne’ebé antes ne’e rejista hamutuk haat kompostu husi pozitivu rua no suspeitadu na’in-rua (na’in-rua iha Aldeia Uaturau, Suku Gariuai, na’in-ida iha Aldeia Ana-Ulo Vila Antiga, Suku Bahú no rua seluk iha Watulete Vila Nova, Suku Tirilolo).
Entretantu, TATOLI tenta halo konfirmasaun ba ekipa task force Munisípiu Baukau kona-ba asuntu ne’e maibé la fó komentáriu ho razaun sei akumula dadus.
Jornalista: Natalino Belo
Editór: Xisto Freitas da Piedade
