Uniaun Europeia sei apoiu millaun $10-resin ba setór justisa-ekonomia iha TL

DILI, 13 Maiu 2026 (TATOLI)—Ministru Negósiu Estranjeiru no Kooperasaun, Bendito dos Santos Freitas, hateten Governu Uniaun Europeia sei apoiu montante millaun $10-resin ba programa dijitalizasaun reforma justisa no empreza mikro pekeña iha Timor-Leste.

Tuir projetu ne’ebé aprezenta husi Ministru Negósiu Estranjeirus no Kooperasaun, Bendito dos Santos Freitas, Konsellu Ministru delibera hodi autoriza selebrasaun akordu finansiamentu entre Repúblika Demokrátika Timor-Leste no Uniaun Europeia relasiona ho asaun “Kriasaun no Dezenvolvimentu Negósiu Sustentável no Ekonomia Sirkulár (CRESCE)” no “Governasaun Eletrónika ba Sistema Judisiál iha Timor-Leste (e-JUS TL)”.

Tamba ne’e, Ministru Negósiu Estranjeiru, Bendito dos Santos Freitas, hateten CRESCE ne’e kooperasaun entre Timor-Leste ho Uniaun Europeia fortalese iha kuadru kooperasaun hahú husi tinan 2021 to’o 2027, ne’ebé Governu Uniaun Europeia atu fó apoiu mai Timor-Leste ho montante millaun $10.

“Iha kuadru akordu ne’e kona-ba atividade ekonomia, Pekena no mikro empreza sira ho montante millaun $3,5, atu bele dezenvolve atividade ne’e maibé iha prazu durasaun tinan haat liu,” Ministru Bendito relata ba jornalista sira iha Palásiu Governu, ohin.

Nia hatutan akordu ida fali mak kona-ba dijitalizasaun reforma justisa no Ministériu relevante mak sei atende ba programa ida ne’e, nune’e osan ne’ebé sira apoiu ne’e hamutuk millaun $7, no iha loron 28-29 fulan-Maiu sei asina akordu ho Diretór Uniaun Europeia ne’ebé sei mai iha Timor.

Enkuantu programa CRESCE, ne’ebé ho finansiamentu euro millaun $3,5 ne’e ho objetivu apoia kriasaun no dezenvolvimentu negósiu sustentável no mós inisiativa ekonomia sirkulár nian iha Timor-Leste, hodi promove diversifikasaun ekonómika, kriasaun empregu no mós modelu produsaun no konsumu nian ne’ebé sustentável ba ambiente.

Nune’e Konsellu Ministru dezigna Vise-Primeiru-Ministru no Ministru Koordenadór Asuntu Ekonómiks atu asina ninia akordu hodi Governu nia naran.

Tanba inisiativa e-JUS TL, ho finansiamentu millaun $7 ho objetivu atu hametin governasaun eletrónika iha sistema judisiál nasionál, hodi kontribui hadi’a asesu ba justisa, aumenta efisiénsia no asesibilidade ba servisu judisiál sira, nomós hasa’e konfiansa públika iha instituisaun justisa, liuhusi ferramenta transformasaun dijitál no governasaun eletrónika.

Enkuantu, ba akordu ida-ne’e, Ministru Justisa hetan dezignasaun nu’udar reprezentante Governu nian ba asinatura instrumentu finansiamentu.

Jornalista : Alexandra da Costa

Editór        : Cancio Ximenes