VIKEKE, 14 Maiu 2026 (TATOLI)—Delegadu Uma-Boot, Suku Luka, Postu Administrativu Vikeke Vila, Munisípiu Vikeke, Mariano Mendonça, informa akontesimentu udan boot hamosu inundasaun husi mota Uelolo afeta ba uma-kain neen.
“Akontesimentu intensidade udan ne’ebé boot hamosu inundasaun hodi afeta ba uma-kain neen nia uma, nune’e ami deside dezloka ita-nia abitante sira bá iha sentru evakuasaun hodi asegura sira iha tempu udan no mota tun,” Mariano ba TATOLI iha Postu Vikeke Vila, Kinta ne’e.
Nia esplika númeru uma-kain ne’ebé daudaun afetadu ba inundasaun ne’e hamutuk uma-kain 15, maibé aloka ba sentru evakuasaun ne’e iha uma-kain neen tanba sira-nia uma bee nakonu, enkuantu uma-kain sia ne’e ladún afetadu.
“Maibé karik mak kontinua akontese udan boot, uma-kain balun sei muda bá sentru evakuasaun atu evita risku dezastre naturál. Daudaun ne’e ami monta ona stand hamutuk sanulu (10) iha sentru evakuasaun hodi prepara ba populasaun hodi hela,” nia subliña.
Mariano informa, kona-ba hahán ba vítima inundasaun, sentru evakuasaun prepara foos hodi fornese ba vítima sira hodi aguenta moris iha situasun inundasaun referida.
Nia relata, uma-kain neen ne’e kompostu husi kada uma-kain iha na’in-haat, balun na’in-lima no balun na’in-neen.
Iha fatin seluk, Xefe Departamentu Jestaun Risku Dezastre Naturál husi Autoridade Protesaun Sivíl (APC-sigla portugeza) Munisípiu Vikeke, Eugénio Guterres relata, kona-ba situasaun klima iha Munisípiu Vikeke iha semana ida-ne’e, APC foin rejista vítima inundasaun uma-kain neen husi Aldeia Uma-Boot, Suku Luka, enkuantu suku seluk seidauk rejistadu.
“Daudaun ne’e ami hamutuk ho Care International iha ona dalan atu bá Aldeia Uma Boot, maibé tanba mota Uelolo tun hela entaun ami agora hein hela iha mota sorin. Depoiz mota ne’e tun hotu, ami sei ba haree vítima sira,” nia tenik.
Jornalista: Vitorino Lopes da Costa
Editór: Xisto Freitas da Piedade
