DILI, 15 Maiu 2026 (TATOLI)—Empreza NIBRI 0507, Lda, sesta ne’e, iha edifidiu Unidade Polísia Marítima (UPM) Lesidere, entrega Ró Lancha foun lima (5) hodi reforsa servisu kombate peska ilegál.
Serimónia entrega ekipamentu marítima refere hanesan parte husi esforsu institusionál atu hametin kapasidade operasional UPM iha área patrullamentu tasi, seguransa fronteira marítima no resposta ba situasaun emerjénsia iha área kosteira Timor-Leste.
Komandante Jerál PNTL, Komisariu Assstente Polísia Afonso dos Santos, hateten entrega body ró lancha foun sira sei fó kontribuisaun boot ba servisu operasionál PNTL nian, liuliu UPM bele aumenta efisiénsia patrullamentu no garante seguransa iha Tasi territoriu Timor-Leste.
“Modernizasaun ekipamentu no meiu operasionál importante tebes atu responde ba dezafiu seguransa marítima ne’ebé kontinua aumenta, inklui prevensaun krime transnasionál, atividade ilegál iha tasi no apoiu ba komunidade iha área kosteira,” Komisariu Assstente Polísia Afonso dos Santos, hateten.
Aleinde ne’e, kompaña NIBRI 0507, Lda, entrega ekipamentu entrega body ró lancha foun lima ne’e reprezenta forma kooperasaun no kompromisu atu apoiu instituisaun seguransa sira iha Timor-Leste liuliu iha setór marítima.
Ho body ró lancha foun lima ne’e, fiar katak UPM bele aumenta prontidaun operasionál no reforsa servisu manutensaun seguransa no ordem públika iha área marítima nasional.
Komandante UPM, Superintendente Xefe Polísia Eugénio Pereira, hateten prosesu sosa ró sira ne’e tama iha orsamentu 2025 nian.
Nia esplika, manutensaun ba ró sira sei halo ho apoiu husi Australia Border Force (ABF), ne’ebé ajuda fornese mákina 200 horsepower ba operasaun marítima.
“Ba distribuisaun ró sira ne’e, ami sei koloka ida iha Suai no ida iha Oekusi atu apoiu postu vijilánsia sira hodi kontrola atividade seguransa marítima. Ami mós sei apoiu ida ba Kom no ida ba Ataúru,” nia dehan.
Nia mós husu konsiderasaun atu instala tán postu vijilánsia iha área Loré-Lautein no Beasu-Vikeke, tanba atividade ilegál barak akontese iha parte súl rai-laran. Planu seluk mak atu instala postu vijilánsia iha Munisípiu Baukau-Mulia nian atu reforsa protesaun hasoru peska ilegál.
Diretór Empreza NIBRE, Luís Alves, hateten ró sira-ne’e ho kualidade ne’ebé di’ak no bele halo kmaan UMP nia servisu.
“Ró ida-idak iha kualidade di’ak-liu tanba ami aumenta espesifikasaun balun hanesan uza materiál stainless no hadi’a dashboard atu garante durabilidade no seguransa,” nia hateten.
Totál orsamentu hodi sosa ró hirak ne’e hamutuk rihun $147.
Jornalista : Hortêncio Sanchez
Editór : Cancio Ximenes
