DILI, 15 Maiu 2026 (TATOLI)–Ministériu Obras Públikas (MOP), Sesta ne’e, realiza marsa saudável, doasaun raan, no mini bazár iha ámbitu komemorasaun loron Restaurasaun Independénsia Timor-Leste ba dala-24, ne’ebé sei akontese iha loron 20 Maiu 2026.
Vise-Ministru Infraestrutura MOP, Júlio do Carmo, hateten, atividade ne’e la’ós foin mak halo maibé kada tinan sira sempre halo, liuliu doasaun raan nian tamba ran turuk ida bele salva ema sira-ne’ebé presiza nia moris.
“Doasaun ran nian, funsionáriu hotu-hotu mak fó doasaun, ita la hili, maibé ne’e prefere ba funsionáriu hotu ne’ebé serbisu iha MOP, raan hamutuk litru 37, tinan kotuk ita oferese ran hamutuk litru 200-resin, maibé agora menus tamba informasaun tarde husi parte CVTL no MS,” Vise-Ministru MOP, informa ba Jornalista sira iha edifísiu MOP, Kaikoli.
Notísia relevante : PM Xanana: “Komemora restaurasaun Independénsia momentu halo reflesaun”
Enkuantu, marsa saudável ohin hala’o husi Iggreja Motael to’o edifisíu MOP Kaikoli, ne’ebé partisipa mós husi ministériu seluk hanesan Ministériu Administrasaun Estatál (MAE), Komisaun Funsaun Públika (KFP), Ministériu Justisa (MJ) no Asaun Feto Timor-Leste, nune’e tinan oin planeia atu konvida tan ministériu sira seluk.
“Atividade ne’e organiza husi kada depertamentu ne’ebé ita la tau osan ruma, kada departamentu mak tau osan rasik hodi halo mini bazár,” Governante ne’e akresenta.
Vise-Ministru konsidera, loron restaurasaun independénsia ba dala-24 ne’e hanesan loron ba reflesaun.
Nia nota, prosesu infraestrutura iha Timor-Leste la’o ho di’ak maski la konklui to’o 100%, tamba estrada nasionál, estrada rurál, estrada urbana balun di’ak ona tamba esforsu no kooperasaun serbisu husi ministériu hotu.
“Tamba ne’e, tempu ukun-an hanorin ita hotu atu serbisu hamutuk, liuliu governante sira tenke hala’o serbisu ho di’ak tuir programa ne’ebé trasa husi Xefe Governu atu garante nesesidade ba ema hotu,” nia katak.
Jornalista : Alexandra da Costa
Editora : Julia Chatarina
