Traballadór 182.523 rejistu ona iha sistema kontributivu seguransa sosiál
DILI, 17 Maiu 2026 (TATOLI)—Prezidente Konsellu Administrasaun Institutu Nasionál Seguransa Sosiál (INSS), Zeferino da Costa Bobo, informa, traballadór ne’ebé rejistu iha sistema kontributivu seguransa sosiál hamutuk 182.523.
Husi númeru ne’e, setór privadu hamutuk 89.025 no setór públiku 93.498. Ema sira-ne’ebé la serbisu iha fatin ida maibé sira buka mesak hodi sustenta sira-nia an ka fakultativu hamutuk 13.153.
Notísia relevante : INSS halo ona pagamentu ba funsionáriu reformadu iha semana kotuk
Enkuantu, totál empreza ne’ebé rejistu iha sistema kontributivu seguransa sosiál hamutuk 6.357, empreza públiku iha 129, ne’e mak Ajénsia TATOLI, Eletrisidade Timor-Leste (EDTL), INSS no seluk tan. Maibé ministériu ne’ebé temi ho naran Governu.
“Ida-ne’e mak ita-nia traballadór ne’ebé mai rejistu iha sistema kontributivu seguransa sosiál no empreza privadu no públiku. Agora ita ko’alia kona-ba empreza privadu mak baibain ita temi barang usaha milik negara,” hato’o ba Ajénsia TATOLI foin lalais ne’e, iha ninia knaar fatin, Kaikoli.
Biban ne’e, nia apela ba empreza ne’ebé iha traballadór sira-ne’ebé serbisu tenke mai rejistu tanba bele asegura traballadór nia futuru kuandu tama ba idade reforma.
Jornalista : Osória Marques
Editora : Julia Chatarina
