Empreza Woodside garante sei iha progresu ronda daruak ba Greater Sunrise
DILI, 18 Maiu 2026 (TATOLI)—Vise-Prezidente Ezekutiva Woodside, Julie Fallon, hala’o enkontru ho Primeiru-Ministru, Kay Rala Xanana Gusmão, hodi atualiza kona-ba progresu greater sunrise no nia garante katak sei iha progresu ba negosiasaun ronda daruak ba greater sunrise nian iha fulan-Juñu 2026.
Nia hateten, ohin diskusaun ne’e sira atualiza kona-ba progresu husi kolaborasaun akordu (agreement) ne’ebé asina iha tinan kotuk entre empreza Woodside ho Ministériu Petróleu no Rekursu Minerál.
“Kona-ba greater sunrise nian iha parte téknika, servisu la’o di’ak entre funsionáriu tékniku Woodside nian no funsionáriu tékniku Ministériu Petróleu nian. Hanesan ha’u hatene, iha ona konkursu públiku sira-ne’ebé prepara ba levantamentu no seluk-seluk ne’ebé presiza halo,” Vise-Prezidente Greater Sunrise ne’e informa ba jornalista sira iha Palásiu Governu, ohin.
Nia hatutan, iha negosiasaun sira tuir Tratadu Fronteira Marítima sei la’o hela maibé ida-ne’e la’o di’ak tanba parte rua konkorda atu finaliza dokumentu sira ho lalais no parte hotu esforsu atu lori ida-ne’e ba konkluzaun lalais iha aliñamentu razoável, maibé iha detallu barak mak sei presiza servisu.
Tanba iha estudu konseitu ida-ne’ebé halo iha ona iha tinan 2024, no estudu ne’e halo rasik husi Wood Group nu’udar organizasaun independente no avalia dezenvolvimentu Timor LNG iha kosta súl Timor-Leste.
“Ida-ne’e mós haree ba dezenvolvimentu sira iha Darwin ho LNG foun no sei harii ho fasilidade LNG ne’ebé iha ona ka dezenvolvimentu Greenfields, katak fasilidade LNG foun iha hotu Darwin,” nia informa.
Aleinde ne’e, nia dehan, estudu ne’e identifika katak konseitu hotu bele viável, maibé iha risku balun tanba ne’e ida-idak presiza servisu tan atu determina dalan di’ak-liu ba oin, atu nune’e iha negosiasaun ronda daruak nian bele lori progresu hanesan ho negosiasaun liubá.
Nia haktuir, durante enkontru Primeiru-Ministru nafatin husu atu aselera lalais projetu ida-ne’e tuir tempu ne’ebé determina.
Jornalista : Alexandra da Costa
Editór : Cancio Ximenes
