VIKEKE, 18 Maiu 2026 (TATOLI)—Servisu Ministériu Obra Públika (MOP) Munisípiu Vikeke orienta Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P.), Segunda ne’e, hahú normaliza hikas estrada husi diresaun Postu Vikeke Vila liga bá Postu Uatulari no husi Postu Uatulari bá Postu Uatukarbau ne’ebé hetan estragu husi udan.
Koordenadór MOP Munisípiu Vikeke, Mário Ângelo Menezes, haktuir akontesimentu udan boot iha fulan ida-ne’e estraga infraestrutura estrada sira no ponte sira husi Vikeke Vila liga bá Uatulari no Uatukarbau hodi difikulta movimentu transporte públiku sira.
“Durante akontese udan boot iha fulan Maiu ne’e afeta tebes ba ita-nia estrada sira husi Vikeke Vila, liga Uatulari no Uatukarbau. Ami identifika estragu barak. Pontu estragu ida iha área Abat, Suku Maluru, Ponte Beaço no parte Adarai nian estrada besik kotu. Nune’e, husi Uatulari liga bá Uatukarbau área sira-ne’ebé aat mak hanesan parte mota Alembata, Suku Babulu, Didimera no ponte Metauai, Suku Vessoru,” Mário Ângelo Menezes ba TATOLI iha Postu Vikeke Vila, Segunda ne’e.
Kona-ba medida normalizasaun, nia dehan, husi Postu Vikeke Vila bá Uatulari IGEADI mak halo normalizasaun komesa husi Raitahu hodi normaliza estrada sira-ne’ebé estragu husi udan boot.
Nia hatutan estrada husi Uatulari bá parte Uatukarbau liuliu área sira-ne’ebé aat, MOP koordena ho empreza Bere Is Back mak halo normalizasaun tanba empreza ida-ne’e mak besik ba área sira-ne’e.
Observasaun jornalista TATOLI nota parte IGEADE daudaun ne’e halo normalizasaun estrada sira-ne’ebé aat, loke sai bee ne’ebé nalihun iha estrada klaran sira no normalizasaun ne’e to’o ona iha ponte Beasu no ekipa IGEADI balun destaka ona iha área Adarai nian tanba estrada referida ameasadu atu kotu.
Jornalista: Vitorino Lopes da Costa
Editór: Xisto Freitas da Piedade
