DILI, 18 Maiu 2026 (TATOLI) – Parlamentu Nasionál (PN), liuhusi reuniaun plenária segunda-feira ne’e, aprova alterasaun Lei Órgaun Administrasaun Eleitorál, Lei Eleitorál ba PN, no ba Munisipál iha finál globál.
Deputadu sira halo aprovasaun ba Projetu Lei númeru 16/VI 83.ª, alterasaun dahaat ba Lei númeru 5/2006, loron 28 fulan-Dezembru, Órgaun Administrasaun Eleitorál, alterasaun dalimak ba Lei númeru 6/2006, loron 28 fulan-Dezembru, Lei Eleitorál ba Parlamentu Nasionál no alterasaun dahuluk ba Lei númeru 22/2021, loron 4 fulan-Novembru, Lei Eleitorál Munisipál, ne’e ho votu a favór 48, kontra 0 no abstensaun haat.
“Lei pasa iha finál globál”, Prezidente Parlamentu Nasionál, Maria Fernanda Lay, fó sai iha sala plenária Parlamentu, ohin.
Tuir testu orijinál ba projetu lei ne’e ho objetivu husi alterasaun ne’e atu muda artigu tolu iha lei vijente husi pakote lei tolu ne’e, liuliu mandatu no kompozisaun iha órgaun eleitorál hanesan Komisaun Nasionál Eleisaun (CNE, sigla portugés)
atu aumenta komisáriu husi na’in-hitu ba sia.
Razaun aumenta númeru komisáriu tanba haree ba sirkunstánsia no eleisaun rua ne’ebé sei akontese iha tinan oin no númeru atuál konsidera insufisiente hodi responde ba serbisu sira.
Iha projetu lei ne’e hakarak esklui reprezentante husi órgaun Konsellu Majistratura Judisiál no Ministériu Públiku. Ho nune’e, kompozisaun sei mai de’it husi Prezidénsia Repúblika, Parlamentu Nasionál no Governu, maibé durante diskusaun faze espesialidadade mosu proposta hodi elimina fali proposta inisiál ne’e hodi mantein nafatin tuir lei vijente.
Iha alterasaun projetu lei ne’e mós hodi halo ajustamentu Lei Eleitorál ba Parlamentu no Lei Eleisaun Munisipál prevee artigu ida ko’alia kona-ba koligasaun partidu polítiku iha pré-eleitorál no pós-eleisaun tenke fiksa iha ne’ebá.
Sekretária Komisaun A ne’ebé Trata Asuntu Konstituisionál no Justisa, Albino da Silva, hateten durante diskusaun espesialidade aprezenta proposta alterasaun hamutuk 12 hodi halo armonizasaun, aditamentu, eliminasaun, alterasaun ne’e mós atu CNE halo dezempeñu serbisu di’ak liután no reforsa efetividade prinsípiu igualidade jéneru iha kompozisaun iha lista kandidatura ba deputadu munisipál.
Lembra katak Lei Eleitorál mak regula eleisaun deputadu ba Parlamentu Nasionál no Lei Eleitorál Munisipál regula eleisaun Prezidente Munisípiu, Vise-Prezidente Munisípiu no deputadu asembleia munisipál. Lei Órgaun Administrasaun Eleitorál ko’alia kona-ba órgaun eleitorál ne’ebé ezerse funsaun relativamente ba aktu eleitorál hothotu.
Jornalista: Nelson de Sousa
Editora: Maria Auxiliadora
