Ramos-Horta kompromete atu reabilita Sentru Audiovizuál Max Stahl
DILI, 18 Maiu 2026 (TATOLI)—Prezidente Repúblika, José Ramos-Horta, iha kompromisu atu apoiu halo reabilitasaun ba instalasaun Sentru Audiovizuál Max Stahl Timor-Leste (CAMSTL) ne’ebé daudaun ne’e ninia kondisaun ladun di’ak ona.
“Objetivu ami-nia sorumutu ohin, priméiru ami relata kona-ba situasaun ka servisu Sentru Audivizuál Max Stahl, ne’ebé nu’udar patrimóniu audiovizuál Timor-Lest nian. Ami relata mós relasaun infraestrutura ka instalasaun foun ba iha sentru Audivizuál Max stahl,” Diretór CAMSTL, Eudicitio Pinto, hateten ba jornalista sira hafoin ramata enkontru ho Prezidente Repúblika, José Ramos-Horta, iha Palásiu Prezidensiál Nicolau Lobato, Bairru Pite, ohin.
Nia dehan, kondisaun fatin ne’ebé tau patrimóniu, kultura no identidade nasaun nian agora iha hela kondisaun ne’ebé ladun estavel, nune’e presiza tebes halo reabilitasaun urjente, atu bele rai nafatin patrimóniu hirak ne’e ho seguru.
“Prezidente iha kompromisu hodi bele apoiu instalasaun foun ida-ne’e. Agora komesa ona ho tékniku sira hodi halo enkuadramentu ida para bele ko’alia espesífiku liu oinsá bele reabilita iha tempu badak,” nia dehan.
Kona-ba dezeñu ba projetu reabilitasaun ne’e, nia dehan, ekipa tékniku sira hetan apoiu husi enjeñeiru Flávio Miranda.
“Agora daudaun iha ona tékniku sira-ne’ebé apoiu husi Maun Flávio Miranda, ne’ebé nu’udar enjeñeiru ba projetu ida-ne’e. Dezeñu husi Maun Flávio mak sei halo,” nia hateten.
Iha biban ne’e, Edio mós hateten katak Xefe Estadu sei ko’alia mós ho Governu nian hodi buka dalan ba kooperasaun iha prosesu reabilitasaun ne’e.
“Ita husu ba Prezidente no Prezidente mós ko’alia ho parte Governu nian. Depois iha ona konkordánsia ruma, mak ita bele haree apoiu husi Governu ka apoiu husi Sua Exelénsia rasik. Maibé, felizmente, ida-ne’e agora pozitivu,” nia dehan.
Jornalista : Hortêncio Sanchez
Editór : Cancio Ximenes
