BAUKAU, 19 Maiu 2026 (TATOLI)—Autoridade Postu Administrativu Kelikai Antiga sei selebra Loron Restaurasaun Independénsia ba da-XXIV iha Suku Namanei.
Administradór Postu Administrativu Kelikai Antiga, Francisco Matias Gusmão, esplika desizaun referida foti liuhusi enkontru nivel Asembleia Postu Administravu iha-ne’ebé Suku Namanei sai uma-na’in ba Selebrasaun Loron Restaurasaun Independénsia ho objetivu hasa’e partisipasaun komunidade iha baze.
“Ita limitadu iha orsamentu entaun ita realiza de’it jogu tradisionál futu-manu ho serimónia isár bandeira,” Francisco Gusmão informa ba TATOLI iha Vila Nova, Tersa ne’e.
Francisco Gusmão relata orsamentu ne’ebé utiliza iha selebrasaun loron nasionál ba tinan-ne’e hamutuk $1.496 koloka ba misa agradesimentu, kompra materiál no ai-han.
Aleinde ne’e, Postu Administrativu Kelikai Antigu foin estabelese nune’e selebrasaun loron nasionál sira tenke hala’o rotativa iha suku sira nune’e komunidade hotu bele partisipa no festeja liuliu hasa’e nasionalizmu.
“Eventu ne’e postu nian nune’e konvida komunidade atu partisipa másima,” Francisco Gusmão mensajen.
Entretantu, Postu Administrativu Kelikai antigu hamutuk suku haat kompostu husi Afasá, Namanei, Gurusá no Uaitame ho totál populasaun hamutuk 7.488, kompostu husi mane 3.710 no feto 3.778 ho totál uma-kain hamutuk 2.713.
Jornalista: Natalino Belo
Editór: Xisto Freitas da Piedade
