DILI, 19 Maiu 2026 (TATOLI)—Antigu Ministru Negósiu Estranjeiru Indonézia na’in-rua. Marty Natalegawa no Hassan Wirajuda, akompaña husi Embaixadór Timor-Leste nian iha Indonézia, Roberto Sarmento de Oliveira Soares, no Xefe Reprezentante Embaixada Indonézia iha Timor-Leste, Nugroho Yuwono Aribhimo, hasoru malu ho Primeiru-Ministru hodi diskute kona-ba relasaun Timor-Leste ho Indonézia.
Antigu Ministru Negósiu Estranjeiru Indonézia, Marty Natalegawa, hato’o agradesimentu tanba bele hetan oportunidade hasoru malu ho Xefe Estadu no mós Xefe Governu Timor-Leste nian, tamba ne’e sira hato’o agradese tanba bele simu sira ho di’ak durante sira-nia prezensa iha ne’e hodi komemora loron restaurasaun independénsia Timor-Leste nian ba da-24.
“Ami konsidera katak tinan 24 ba restaurasaun independénsia nasaun ida-nian bele dehan katak tempu ne’ebé lalais, maibé ba Timor-Leste ultrapasa ho di’ak no iha dezenvolvimentu,” Antigu Miniatru Negósiu Estranjeiru Indonézia ne’e informa ba jornalista sira iha Palásiu Governu, ohin.
Nia dehan, mudansa ne’e la’ós de’it dezenvolvimentu fíziku ekonomia ne’ebé bele haree maibé papel Timor-Leste iha rejiaun sira seluk, liu adezaun ba ASEAN, no seluk tan mak sei asume prezidénsia ASEAN.
“Tanba ne’e ami mós hato’o ami-nia parabéns ba Timor-Leste ne’ebé sei asume prezidénsia ASEAN iha tinan 2029,” nia dehan.
Iha biban ne’e, sira mós apresia ba Timor-Leste nia esforsu maske daudaun ne’e iha hela situasaun konflitu, maibé Timor-Leste sai diferensa tamba hatudu ninia komitmentu ba pás no estabilidade no Indonézia agradese bele iha nasaun vizinhu hanesan ne’e.
“Ami mós agradese ba kondekorasaun ne’ebé Governu Timor-Leste fó mai ami na’in-rua, ne’ebé ami mós hola parte ba kontribuisaun no promove relasaun nasaun rua nian. Relasaun entre nasaun rua ne’e iha signifikante ne’ebé espesífiku, kondekorasaun ne’e nu’udar nasaun ba Indonézia la’ós ba pesoál,” nia hateten.
Enkuantu, antigu membru Governu Indonézia na’in-rua ne’e hanesan konvidadu espesiál ne’e mak ohin mai hasoru Primeiru-Ministru hodi diskute kona-ba kooperasaun servisu entre nasaun Indonézia ba ASEAN nian.
Tanba delegasaun na’in-rua ne’e kontribui esepsionalmente ba iha Timor-Leste ho Indonézia no Timor-Leste ho ASEAN.
Jornalista : Alexandra da Costa
Editór : Cancio Ximenes
