KOVALIMA, 19 Maiu 2026 (TATOLI)- Prezidente Autoridade Munisípiu Kovalima,Miguel Armada Cardoso, informa sede suku 30 iha Kovalima hetan ona instalasaun rede Starlink atu fasilita servisu autoridade suku sira-nia iha era dijital ne’e.
“Polítika instalasaun rede Starlink iha sede suku 30, Postu Administrativu 7, iha Munisípiu Kovalima hodi fó apoiu autoridade suku-sira hodi rejista Sistema Informasaun Gestaun dadus Suku no Aldeia (SIIGSA) molok ne’e aprezenta dadus katak ofline no online ho rede Stalink bele fasilita sira hodi submete mai iha Balkaun Úniku (BU) tanba durante ne’e rede la’o lentu no laiha rede internet”, dehan PAM Kovalima ne’e.
PAM simu keixa balun husi Autoridade suku sira katak atu asesu ba rede Starlink la di’ak no atu uza WIFI la di’ak.
“ Loos duni Instalasaun Starlink iha fatin balun koneksaun iha komputadór hotu maibé balun ladi’ak ami rejista ona no hato’o ba nasional hodi hadia fali liña, nune’e funsionariu sira bele asesu WIFI no hodi aselera dadus SIIGSA,” nia afirma.
Autoridade Suku Prokupa
Xefe Suku Cassabauc, Postu Tilomar- Kovalima, Octavio Maia, dehan sira nia sede suku hetan instalasaun ona rede Starlink, maibé koneksaun ba WIFI ba laptop seluk mak ladauk di’ak.
“Ami kontente ba instalasaun rede Stalink iha suku sira tanba atu fasilita ami halo servisu administrasaun suku ho lais liu haree rede internet la falla ,maibé ami nafatin informa katak iha Suku Cassabauk halo koneksaun ba WIFI mak ladauk di’ak,” nia relata.
Nune’e, Nia husu ba tékniku sira bele fó oportunidade ba xefe suku no funsionáriu sira iha suku bele koneksaun WIFI no mós bele halokonesaun ba komputadór sira seluk tanba komputadór ida de’it sei la garante servisu administrasaun.
Entertantu, Xefe Suku Belulik-Leten, Postu Administrativu Fatumea, Oscar Perreira Amaral reforsa katak politika instalasaun ne’e di’ak hodi fasilita servisu administrasaun iha suku sira.
“ Ami hato’o agradese ba Ministériu Administrasaun Estatal (MAE) ne’ebé fasilita ona ami hodi instala ona rede starlink, maibé ami preokupa atu asesu WIFI Starlink tanba iha limitasaun, nune’e komputadór tolu mak koneksaun ba rede starlink labele. Tanba ne’e nia husu se bele fó oportunidade ba ami nia pesoál suku sira asesu WIFI iha sira-nia telefone, nune’e bainhira manda dadus liuhosi telefone bele lais,” nia afirma.
Notisia relevante: Instalasaun liña internét iha suku apoia tebes serbisu atualizasaun dadus ba sistema
Jornalista: Celestina Teles
Editór: Florencio Miranda Ximenes
