DILI, 19 Maiu 2026 (TATOLI) – Ministru Juventude Desportu Arte no Kultura (MJDAK), Nelyo Isaac Sarmento, hateten tinan 24 restaurasaun independénsia hanesan momentu reflesaun ida ba ema hotu.
“Tinan 24 ne’e atu fó mós reflesaun ida ba federasaun desportiva no ema hotu oinsa atu prodús ita-nia atleta sira ho kualidade hodi refleta ba tema jerál ne’ebé iha,” Ministru Nelyo hateten ba jornalista sira iha edifisiu MJDAK, tersa ne’e.
Nia dehan, agora tempu ona atu hateke ba oin ho progresu ne’ebé di’ak hodi dezenvolve desportu iha nasaun ne’e atu nune’e atleta sira bele sai eroi foun ba nasun ne’e.
“Ho tinan 24 ne’e bolu atensaun mós ba federasaun desportiva no ema hotu, Konfederasaun Desportiva Timor-Leste (CDTL-sigla portugés), Komite Olímpliku Nasionál Timor-Leste (CONTL-sigla portugés) mai ita tur hamutuk, tinan 24 ona partisipa iha eventu lubuk ida, nia prestasaun mak nune’e hela de’it, ita kontinua hanesan ne’e ka muda ita-nia mentalidade sira hodi hakat ba oin,” nia tenik.
Tanba ne’e, nia husu ba ema hotu atu integra ho polítika Estadu nian ba iha dezenvolvimentu desportu atu foku ba modalidade ne’ebé mak haree kompetetivu atu ba kompete ho nasaun sira iha ASEAN no seluk tan.
“Ita foku nafatin dezenvolve joven sira-nia talentu iha modalidade oioin no atividade saida de’it, ita tenke fó kondisaun di’ak ba sira hotu atu nune’e tinan 10 mai ita iha ona atleta kualidade mundu mós bele sura ona ita,” nia konklui.
Entretantu, tema importante ba komemorasaun tinan 24 restaurasaun independensia 20 de Maiu mak ‘Hamutuk ita harii, Patria ida ne’ebé justa, enkluziva no rejiliente liutan’.
Jornalista : Hortêncio Sanchez
Editór : Cancio Ximenes
