DILI, 20 Maiu 2026 (TATOLI)—Ministra Saúde, Elia dos Reis, hato’o agradesimentu ba entidade sira-ne’ebé preokupa ba área saúde no nia promote atu sei sei hadia servisu sira ba oin sei di’ak liután.
“Ohin, ita komemora loron restaurasaun indepedénsia katak ita indepedénsia ba konstrusaun Estadu. Katak, buat hotu sei la’o fazeadamente, ita sei hadi’a servisu ne’ebé mak iha,” Elia dos Reis Amaral dehan ba jornalista sira iha Tasi-Tolu, ohin.
Nia hateten, área saúde ema hotu preokupa inklui aman veteranu Lere Anan Timor, nune’e Ministeriu Saúde sempre hato’o agardesimentu, nune’e ba oin had’ia di’ak liután.
”Hanesan aman ba nasaun ita agradese fó hanoin, liuliu ba observasaun ne’ebé señor Lere observa ona. Ita hatene iha konstrusaun Estadu, buat sira-ne’e la’o fazeadamente, nune’e ita bele hadi’a di’ak liután ba oin,” nia relata.
Antes ne’e, Veteranu Lere Anan Timor hateten ba kestaun saúde ikus ne’e hanoin katak saúde ladun funsiona di’ak ona, tanba veteranu barak ba husu atu ba li’ur ne’e sira dehan hein lai to’o agora, veteranu balun sai mate.
”Ezemplu, ba ha’u, uluk-uluk ne’e Estadu mak haree maibé ikus mai ha’u baruk ona’ entaun ha’u lori osan uitoan ne’ebé atu suporta ba ha’u nian oan sira ba eskola ne’e mak ha’u lori trata ha’u-nia saúde. Maibé laiha buat ida, tanba veteranu la’os ida ka rua, maibe veteranu ne’e barak. Dalaruma ita fó sala ba ha’u-nia feton Ministra Saúde, mais ha’u hanoin katak nia mós iha problema, no nia mós iha difikuldade. Ne’ebé, tinan 24 ne’e reflesaun ba Ministra Saúde mós, la’os ba nia de’it maibé ba ukun na’in sira hotu,” nia esplika.
Nia haktuir, refleksaun la’ós ba de’it Ministra Saúde de’it maibé ba ema sira saúde ne’e hotu, tanba saida mak ema mate loro-loron liu fali COVID-19 ne’e.
“COVID-19 ne’e ema hotu-hotu tauk, ema mai iha ne’e obriga ha’u atu dehan ba karantina, maibé ha’u dehan la’ós ita-boot maa kaer ha’u nia vida, ha’u mak kaer ha’u-nia moris. Ha’u hatene banhira mak ha’u mate, ha’u hatene. Imi lalika mai, mais afinál ema la mate barak. Agora, kuitadu, ema mate foin daudauk ha’u-nia alin no saudozu Marito Mota mate ho tinan 55. Dadeer ha’u-nia Primu rasik mós mate ho tinan 50 itál, la to’o semana ida, rian rasik mate ho tinan 60 itál. La’os ida-ne’e de’it, banhira ha’u mai husi Lospalos mai Dili, karreta lori mate-isin hira mak hasoru ha’u, dalaruma haat ka lima. Ida-ne’e ba lorosa’e de’it, agora ba parte Oeste la hatene,” nia dehan.
Veteranu ne’e afirma refleksaun ba saúde, liuliu ba Ministra Saúde ne’ebé Xefe ba saúde nian, tanba saida mak ema sira agora mate loron-loron, depois ho idade nurak, ida-ne’e refleksaun ba nia.
Jornalista : Felicidade Ximenes
Editór : Cancio Ximenes
