DILI, 20 Maiu 2026 (TATOLI)—Ministru Justisa, Sergio Hornai, hateten, dezenvolvimentu setór justisa hahú marka pasu pozitivu tanba ho prezensa husi Supremu Tribunál Justisa (STJ).
“Ita haree iha tinan 24 nia laran, ita-nia Restaurasaun Independénsia iha buat barak mak dezenvolve-an, liuliu iha setór justisa rasik, ita haree maski ho limitasaun rekursu maibé ita kontinua la’o. Maibé daudaun ho estabelesimentu Supremu Tribunál Justisa nu’udar dezenvolvimentu pasu iha setór justisa,” Ministru Justisa, hato’o ba jornalista sira hafoin partisipa iha serimónia Restaurasaun Independénsia ba dala-24, ne’ebé hala’o iha Tasi-Tolu, Kuarta ne’e.
Notísia relevante: Komisaun Rekrutamentu Juíz ba STJ hahú serbisu iha edifísiu provizóriu
Nia dehan, durante ne’e Timor-Leste iha de’it Tribunál Judisiál Primeira Instánsia Dili no Tribunál Rekursu, maibé ho prezensa Supremu Tribunál ne’e bele mellora liután setór justisa nia serbisu inklui haforsa justisa iha Timor -Leste.
“Ho prezensa Supremu Tribunál ne’ebé tempu badak sei harii mak sei fó asisténsia justisa ba povu ho di’ak,” nia katak.
Governante ne’e hatutan, daudaun tuir Lei Organizasaun Judisiária, Komisaun ba Rekrutamentu Juíz hahú halo ona sira-nia serbisu no la kleur tan juri sira iha ona no hahú halo on selesaun ba juíz sira ne’ebé sei tuur iha Supremu Tribunál.
“La kleur tan ita iha ona Juíz Konselleiru sira ne’ebé tuur iha Supremu Tribunál, ho nune’e ita garante katak bele mellora serbiau ho di’ak liliu iha setór justisa,” nia hato’o.
Jornalista : Natalino Costa
Editora : Julia Chatarina
