DILI, 20 Maiu 2026 (TATOLI)—Ministériu Justisa (MJ) halo ona averiguasaun ba Guarda Prizionál na’in-neen ne’ebé halo agresaun fizíka hasoru dadur ida iha Prizaun Bekora.
“Daudaun ne’e Ministériu justisa hatun ona despaisu ba Inspetór Auditoria nian hodi halo averiguasaun, sira sei fó informasaun detallu, husi ne’e bele foti desizaun. Dala-ida tan ha’u dehan ita halo ona averiguasaun kona-ba motivu tanba kazu ida-ne’e akontese iha duni ka lae razaun tanba sá, ne’ebé ita sei halo averiguasaun ita haree took nia rezultadu, to’o iha konkluizaun mak ita remesa, kuandu eziste infrasaun kriminál ruma,” Ministru Justisa, Sergio Hornai, hateten ba jornalista sira hafoin partisipa serimónia Restaurasaun Independénsia Timor-Leste ba dala-24, ne’ebé hala’o iha Tasi-Tolu, Kuarta ne’e.
Notísia relevante: PDHJ kondena guarda prizionál ne’ebé baku dadur estranjeiru iha Bekora
Nia dehan, hafoin simu karta husi Provedoria Direitu Umanu no Justisa (PDHJ), nia parte orienta kedan Inspetór sira hodi halo serbisu.
“Ha’u simu karta husi PDHJ, ha’u fó ona instrusaun ba Inspetór sira halo sira-nia serbisu apura iha prosesu administrativu ne’e nian, ita sei enkamiña ba institusaun relevante,” nia akresenta.
Rekorda katak iha loron (13/05), PDHJ liuhusi sira-nia mornitorizasaun identifika katak iha Gurada Prizionál na’in-neen mak suspeitadu halo agresaun fizíka hasoru rekluzu estranjeiru ida-ne’ebé daudaun kumpre hela nia pena iha Prizaun Bekora.
Jornalista : Natalino Costa
Editora : Julia Chatarina
