BAUKAU, 20 Maiu 2026 (TATOLI)–Autoridade Munisipál Baukau liuhusi Selebrasaun Loron Restaurasaun Independénsia ba da-XXIV (20 Maiu 2002-20 Maiu 2026) husu Baukau-oan atu halo reflesaun iha pasadu no hanoin ba malu hodi kontribui dezenvolve Baukau iha futuru.
Prezidente Autoridade Munisipál (PAM) Baukau, Veneranda Eurico Lemos Martins, esplika Selebrasaun Loron Restaurasaun Independénsia atuál hala’o ona tinan 24 nune’e husu entidade hotu halo reflesaun liuliu hanoin hikaas luta eroi sira antes Timor-Leste hetan liberdade no hafoin restaura independénsia.
“Ita tenke halo reflesaun ba kotuk liuliu nafatin husu ba eroi no eroina sira atu futuru povu bele moris iha dezenvolvementu ne’ebé sustentavel no ekonomia ne’ebé reziliente,” Veneranda Lemos hateten iha resintu Administrasaun Munisipál Vila Nova, Kuarta ne’e.
Eis deputada ne’e rekoñese hafoin restaura independénsia durante tinan 24, dezenvolvimentu iha setór infraestrutura, edukasaun, saúde no seluk tan hahú hala’o mezmu seidauk másima maibé tenke otimista iha faturu Timor-Leste sei liberta an husi pobreza.
Aleinde ne’e, Autoridade Munisipál Baukau hato’o agradesimentu ba komunidade Baukau-oan hotu no husu nafatin unidade no inklui hamutuk dezenvolve Baukau bá-oin.
“Ita hotu fó liman ba malu nu’udár Baukau-oan no fiar katak dezenvolvimentu mezmu neneik maibé beibeik,” Veneranda Lemos akresenta.
Veneranda apresia ho funsionáriu ne’ebé la kole hanesan dirijente iha AMB, Diretór Serbisu Munisipál no Delegasaun Territoriál ne’ebé nafatin kontribui ba Baukau liuhusi kna’ar no responsabilidade ho hanoin ida katak Baukau tenke kontinua bá-oin.
Entretantu, Selebrasaun Loron Restaurasaun Independénsia ba da-XXIV ho tema “Hamutuk ita harii pátria ida-ne’ebé justa, inkluziva no reziliénte” iha Munisípiu Baukau realiza ho atividade limpeza jerál, jogu tradisionál futu-manu, misa agradesimentu no isár bandeira ne’ebé partisipa husi autoridade sivíl no militár, kombatente, estudante no komunidade iha resintu Administrasaun Munisipál Vila Nova.
Jornalista: Natalino Belo
Editór: Xisto Freitas da Piedade
